قرار رأفتانى غاشم
بالغاء عيد الاضحى والكريسماس وراس السنه واعياد الميلاد لهذا العام ودمجها جميعا مع عيدى الشرطه وعيد القمح
وكل عام وانت بصحه وخير
Friday, December 29, 2006
Monday, December 18, 2006
بين معارضه الاحزاب ومصداقيه التدوين
الاحزاب فى مصر مشروع حكومى فاشل. فأى مؤسسه نشأت بقانون حكومى فهى مؤسسه فاشله. واحزاب المعارضه المصريه ما هى الا خلفيه علشان الصوره تطلع حلوه
فاحزاب المعارضه مثلها مثل غيرها من الاحزاب المصريه التى نشأت وتأسست على اساس قانون الاحزاب..والحزب اللى ما يقفش فى الصف ويضرب تعظيم سلام هيروح ورا الشمس حتى اسألوا ايمـن نور..
واهم انجازات قانون الاحزاب هو انشاء على حزب وداد قلبى وعلى حزب الريح ما يودى الريح
الاحزاب المصريه فقدت المصداقيه.. ومن النادر تجد شباب متنور ومتحمس منضم الى اى من تلك الاحزاب..
وانا عن نفسى افضل الانضمام الى فريق الكشافه بتاع تامر حسنى عن الانضمام لاى حزب سياسى مصرى
وفى اليد الاخرى تجد التدوين واصحابه.. تجد المعارضه الحقيقيه والشفافيه الواضحه .. تجد المعارضه من اجل الافضل.. والحق اقول ان احنا كمدونين لا نملك الحل السحرى لكل المشاكل.. ولكن نملك عرض المشكله على الراى العام سواء فى مصر او فى الخارج.. فالمدونون بدأو خطوه ومسيره مهمه فى سبيل وطنى ديموقراطى يحترم آدميه ابناؤه.. فالمدونون بدأو حملات كتيره اخرها حمله مقاطعه جرائد الحكومه الفاشله- تابع مدونه جرجس- والمدونون مشغلون بحريه الرأى والعقيده مثل قضيه كريم عامر وقضيه البهائيين وحبس طلبه الازهر وغيرها من القضايا المهمه
المهم ان فى شعاع نور وممكن يبقى كشاف كبير لو اهتمينا بقضايانا واحترمنا ارائنا و الاراء المعارضه..فنحن اولى بتشجيع الرأى والرأى الاخر... حتى يظهر الله الحق ويبطل الباطل..فتحيه لكل مدون ومدونه
ملحوظه: فتحيه = تحيه . فانا لم اقصد الست فتحيه بتاعه الخضار اللى فى سيدى بشر قبلى عن محطه القطار
Wednesday, December 13, 2006
عـــــــلاقــــه الغــــرام بالأكــــــــــــــــل والمعده
الاغــانى تانــى وتـالت ورابــع وليه لأ ..كل اغنــيه اتغنت او هتتغنـى فيهـــا كوميـديـا خاصـه بيهــا... بـس الاغنيه عازوه اللى يغوص فى المعانـــى ويشيل الغشاوه الغراميـــه اللى عليـــها...علاقه الغرام بالاكل زى الماء والهواء..اى عاشق اصيل لازم يكون اكول كبير.. ولذلك تجد عند معظم الحبيبه التمام..كرش فشر المرحوم محمد رضا
اسمــــع الكـــــــــلام الجميــل فى هذه الاغنيه
ونعيش فى الجمعه سبع تيام
زادنا وذوادنا غرام فى غرام
الناس فى مصر بتقول انا باشتغل علشان لقمه العيش.. وهذا المطرب العبقرى مش محتاج يشتغل... وها تشتغل ليه؟ علشان لقمه العيش؟ ما هو اصلا مش محتاج عيش.. الراجل بياكل فى الجمعه غرام فى غرام.. ويذكر ان مأكول الغرام له طعم مميز والعناصر الغذائيه بتاعته لها فوائد عظيمه ..ولذلك حبس هذا الحبيب حبيبته فى زنزانه وعايشين على مأكول الغرام.. طاب وموضوع الحمّام وخلافه.. يا ناس انتو ما بتفهموش... دا بياكل غرام..والغرام ده ملوش فضلات..
ع البساطه.. البساطه
ياعينى ع البساطه
اكلها جبنه وزيتون
وتعشينى ...بطاطا
حبيب معفن اوى وحبيبته العن منه.. فعلا ربنا يهنى سعيد بسعيده.. الاثنين بٌخلا اوى.. هو قاعد فاضح الدنيا على شويه الجبنه والزيتون وعشمان بأه فى ديك رومى اتاريها متكحرته وضاربها السـلك وجابت له بطاطا.. ويقال ان هذا الحبيب كان عشمان فى بورجر كنج او ماكدنالدز
تحت السجر يا وهيبه
يا مكلنا برتقال
وصاحبك ده.. فاضــح الحبيبه بشـــويه البرتقـال اللى جابــهم...همـه اتنيــن كيلــو عمى بس..فاضح الدنيـا..ماشى فى الشارع بتكلم عن البرتقال..عمل مدونــه اسمها البرتقال...ويقال ان الناس اتخنقت منه فى مصر فبلغوا عنه الحى والبلديه..وعمـلو له محضر نظــافـه لان موسخ البلد كلـــها بقشر البرتــقال
يا حتت مارون جلاسيه
والطعم شيكولاته
سايقه فى دلالك ليه
يا حلوه تاتا تاتا
هذا المطــرب كان من عامه الشعب..وكانت احسن حاجه حلــوه اكلــها فى حياته هى ام على اوطبق بليله وعليه قطعه كنافه..وكان نفسه ومنى عينه يدوق طعم المارون جلاسيه..فاصيب هذا الروميـو بمرض التخيلات والعياذ بالله.. فبقدره قادر اتخيل له ان حبيبته ما هى الا طبــق مارون جلاســيه وهــو قاعــد يجرى وراه..ويتحايــل علي الطبق انه يمشــى بشويش علشــان يلحقه وياكــل منه
Monday, December 4, 2006
وظــائـــــف خـــاليـــــــه
تعلن المملكه الرأفتــانيه البدأ فى قبـول الطلبات للوظائف التاليه
وزاره الدكـــــــر
مطلــوب وزيره حسنه المظهر تجيد القراءه والكتابه واعمال التريكو للعكننه على كل بنى آدم من الرجال وكل ما هو مذكــر من الانعام وذوات الابـــع
وزاره التهييس والتعتيـــــم
مطلــوب وزير منافق وكداب.. ويجيد اشتغاله الشعب الرأفتانى... حاصل على شهاده حورينى يا طيطه
وزاره عشانا عليك يارب
المتقدم لهذا المنصب التخطيطى الحساس يجب ان يجيد الاعمال الحسابيه وفك الخط علشان مزانيه البلد ما تروحش للشعب
وزاره أبـــو قـردان صديــق الفلاح
حاصل على شهاده سرطنه خضار وفاكـهه وما جستير سحب سوداء .. ودراسات عليا فى حريق قش الارز وتسميم مياه الشرب والاستحمام
وزاره هـا..مين هنـاك
على المتقدم لهذا المنصب الحصول على الحزام الاسـود فى الكاراتيه والمصارعه الرومانى.. اجاده ضرب النبله ونط الحبل والعقله والمضرب والسبع طوبات ورمى الجله وعبــور الترعه
وزاره إكـــفى ع الخبر مجــور
المتقدم لهذا المنصب الامنى لازم ولا بد ان يجيد العاب التخفى والتنكر والسبع ورقات ويكون متزوج على مراته او مراته متزوجه عليه من غير الطرف الاخــر ما يعرف لمده لا تقل عن 10 سـنــوات
وزاره كشفت راسى واتجهت
المتقدم لهذا المنصب لازم يكون من اهل الخطوه ومكــــشوف عنه الحجاب..يجيد الفتــاوى الحكوميه بكل الانـواع
من اول تحــريم الحجاب لحد جواز عتريــس من فؤاده باطل
وزاره القفـــــــا
الغرض من هذه الوزاره هـو تطوير وتعريض القفا الشعـبى زى محور 6 اكتـوبر علشان يستحمل الضغط الحكـومى
تقدم الطلبــات باليد مع الاشــاره للواسطه بتاعتك والرشــوه تكــون بالدولار الرأفتـــانى
Friday, December 1, 2006
الحلول الرأفتانيه للازمه السياسيه
واحد قارئ زكى بعت لى رساله كلها غضب. قال فيها ان معظم كتـابـاتى اسود من قرن الخروب ومليئه بالتشاؤم والسخريه.. وسألنى لماذا لا اكتب حلول رافتانيه للازمه السياسيه.. والحق اقول ان الحلول على قفا من يشيل بس فين النفس اللى تصرف.. وامامكم عشـــر حلــول حكـــايه علشــان الازمــه السيــاسيه
الحل الاول
عمل لجنه مضاده للجنه السياسات فى الحزب الوطنى وتكون هذه اللجنه متساويه فى الشكل والطعم واللون والاتجاه
ويكون شعار هذه اللجنه : كـايده العُـزال انا من يومى..أيــوه آه
الحل التانى
تغير اسم مجلس الشعب الى مجلس الامــه برئاسه احمد فتحى سرور
تغير اسم مجلس الشورى الى مجلس الشـعب برئاسه احمد فتحى سرور
تغير مجلس اتحاد الكـــوره ونادى السكه الحديد برئاسه احمد فتحى سرور
الغاء كل المجالس اللى فوق دى وفتح دكــان صغير مكتـوب عليه..احمد فتحى سرور لرئاسه مجلس الامه والشعب والشورى واتحاد الكوره ونادى السكه الحديه
الحل الثالث
تعين تــامر حسنى وزيرا للدفـــاع والداخلــيه والحرببيه والكشـــافه والعيال الخشنــه اوى اوى
الحل الرابع
تعين المطرب الذواق بعــروره وزيرا للثقافــه والزراعه
الحل الخامس
تعين فاروق حسنى وزيرا للاوقاف والازهر وبابا للفا تيكان
الحل السادس
تعيين الدكتــور يــوسف والــى وزيرا للصحه والمواصــلات وجمعيه سلامه المواطنيــين والرفـق بالحيـوان
الحل السابــع
تغير نظـام اختيار رئيس الجمهــوريه لنظــام الاقتــراع وده مختــلف عن نظام الانتخابات والاستفتاء.. الاقتــراع جاى من القــرع العســلى
الحل الثامــن
تشجيـــــع نظام الاقطاع والسلب والنهــب والاصـــلاح الزراعــــى والعـــوده الى الملكــــــيه والبــشويه والبهويه و فــراخ الجمــعيه المخليه
الحل التـاســع
اعـــدام كــل المدونين والمدونـــات ما عدا الرافتانى علشان الرافتانى هيبقى المستشــار السيــاسى للدوله الرأفتـــــانيه
الحل العــاشــر
واستعيــــــنوا بالصبـــــــــــــــر والســــــــــــلوان ..واللى مش عاجبه ... يرمــى نفسه فى المـــالح.. قدام بيـــــر مسعود كده علشـــان الحته دى غويطه أو فى البيطاش فى العجمى- الميه اللى هناك وسخه
