خالد صاحبى المثقف اياه بتاع الثوره البرتقاليه زعلان اوى ان انا باسمع احمد عدويه وخالد قالى فى مره:( انا مش عارف ازاى انسان مثقف زيك ومتعلم فى امريكا بيسمع احمد عدويه). والحق اقول ان احمد عدويه هو احد اربع مطربين عرب باسمع لهم فقط. فانا اسمع لمحمد منير و حنان ماضى وحميد الشاعرى واحمد عدويه فقط لاغير. واذا قارنت هؤلاء المطربون سوف تجد ان معظمهم فيه ميزه معينه وهى ان مفيش مطرب تانى يقدر يغنى اغانيهم. فعندما تسمع منير مثلا تعرف ان الاغنيه اللى بيغنيها لا تصلح الا لمحمد منير فقط وكذلك حنان والرومى وعدويه فهم مميزون فى المجال بتاعهم لابعد الحدود. لو بصيت مثلا لاى اغنيه لعمر دياب ستجد ان الاغنيه اللى بيغيها ينفع انك تسمعها بصوت مصطفى قمر او محمد محى او اى مطرب اخر
انا بدأت اسمع عدويه من وانا صغير واللى عرفنى على عدويه واحد صاحبى اسمه حماده كفته وطبعا هاتسأل ايه اللى خلى واحد زى يعرف واحد اسمه كفته لكن ده موضوع عايز شرح ومش وقتهعدويه بالنسبه لى بيمثل تاريخ وفتره مهمه من فترات تاريخ مصر الحديث وهى فتره الانفتاح وبدايه حكم السادات بعد حرب اكتوبر. عدويه كان ملك الطرب و كان بيعبر عن فئات مهمه جدا من المجتمع المصرى. عدويه يا ساده ماضى وتاريخ وعلى راى المثل من فات قديمه تاه ويا اخونا ياللى فوف ما تبوصوا على اللى تحت وللا اللى ساكن فوق ما يبصش ع اللى تحت وحبه فوق وحبه تحت
10 رأى:
اصل انتى لسه صغيره يا شهروزه لما تكبرى هتعرفى مين احمد عدويه
وبعدين ايه حكايه اذواق دى قصدك ايه
عدوية ليه كذا اغنية معلقة معايا من زمان اهمهم زحمة يا دنيا زحمة ، أول ما افتكرها أفتكر فيلم الدنيا علي جناح يمامة و محمود عبدالعزيز في الفيلم :))
اسمح لي أعبر لك عن تقديري واحترامي، لإعلانك عن حبك لعدوية.
عدوية تقريبا أخر المطربين الشعبيين اللي بجد .
**
تحياتي
يا عم الحاج انت كده كيفتني منك وطلعت راجل صاحب مزاج انت كمان انت عارف والله جهازي اللي باكتبلك منه دلوقتي عليه بيتهوفن وفيفالدي وفاستو بابيتي وعدوية ومحمد طه وام كلثوم ومحمد رشدي وعماد بعرور ولو ما اكلناش خوخ مش هانعرف طعمه من طعم المانجة ولا طعم الجميز فلازم الاختلاف والتعدد في الاذواق حتى للفرد الواحد واسمح لي اقول لشهروزتي خليكي بعيد عن عدوية علشان احنا ما صدقنا انها خفت من الدور اللي جالها اصلها كان جالها الدور اللي ماشي والدور ما نيمهاشي والعين ما سيبهاشي شهروزة ام حسسسسسن
تحياتي يا حاج أر أر
انت كنت عارف ان دماغك دى متكلفه يا حاج مزاجنجى دا احنا ها نبقى اصحاب
ابعث لى ايميل يا عم الحاج علشان ناكل عيش
انا كمان بحب عدوية جنبا بجانب كتير روائع تانية
عدوية ما هو الا لون مغاير لما تعودنا عليه ليه نرفضة
المهم بالنسبة ليا هو رائع و صوته جميل
تحياتي
]اشهروزة أنا مش شايف أي تناقض في الموضوع دة لأني بأشارك المهاجر في زوقة و عندي شريط قديم من بتاع كاسيت صوت الحب بالغلوشة و الضوضاء الأستاتيكية المميزة لموسيقى شرائط كاسيت السبعينات في مصر حولتة ل MP3 و حملتة على ال Ipod علشان أقدر أسمعة في العربية جنبا الى جنب مع محمد منير و محمد فؤاد و علي الحجار و Metallica و Karmina Borana .
يا سلام عليك ياIroncobra40
مزاج يابنى هى الدماغ كده
يا باشا أنت تؤمر أنا مش شايف أي تناقض في أنك تحب بل و تعشق صوت و فكر و موسيقى محمد منير و أنك في نفس الوقت تحب عدوية اللي بأعتبرة مقارنة بكثير من مغنيي هذة الأيام يقدم فنا راقيا على الأقل الراجل ماحاولش يدعي شيئ مش فيةالا لو أنت عايز ترسم نفسك من طبقة مدعي الثقافة فتروح عامل الشويتين بتوع أخييي يارأفت أنت بتسمع عدوية أيياي في المقابل أنا أحب موسيقى الهرد روك والهيفي ميتال و بالذات ميتاليكا وكنت فاكر أنا لوحدي كدة لكنت لقيت القاسم المشترك مابين كتير من محبي منير أنهم أيضا بيحبوا ميتاليكا الموسيقى الكلاسيكية بقى ماليش تقل عليها بعضها باحبة لكن أغلبها لأ و كانت فضيحة لما رحت في النوم و أرتفع شخيري أثناء عرض لأوركسترا لندن الفيلهارمونيك في قاعة الملكة اليزابيث بس دي بقى حكاية لوحدها يمكن أكتب عنها في مذكراتي .
أم كلثوم بقى و عبدالوهاب و كل الناس القديمة دي بأستثناء قلة قليلة و ماحدش يزعل مني لأن للناس فيما يعشقون مذاهب أطيق العمى و لا أطيقهمش
انا كمان بحب احمد عدوية ولدى الله يرحمة كان بيحب يسمعه وبيحب يسمع كمان اغانى المداحين
وغيرها
والصراحة احمد عدوية مختلف وقوى مش ضعيف
ربنا يكرمك يا عم رافت بوست جميل
Post a Comment