العوامل الجغرافيه لها دور كبير فى العشق والحب وخلافه فمثلا الحاج محمد عبد المطلب قال (ساكن فى حى السيده وحبيبى ساكن فى الحسين وعشان انول كل الرضا يوماتى اروحله مرتين) وعلى ايام الحاج محمد الظاهر ماكنش فى موصلات لان المسافه من السيده للحسين مش محتاجه العويل واللطم دا كله. امال لو كان هوه ساكن فى الهرم وحبيبه فى مدينه نصر مثلا كان عمل ايه
والعبقرى احمد عدويه خطى على نفس الخطى الجغرافيه حيث قال( سعيده يا حلوه سعيده..موصلاتك بعيده .. أؤمرى وانا اجيلك ماشى ..لما لمصر الجديده) وذكاء عدويه انه مقلناش انه هيمشى لمصر الجديده منين بالضبط. فترك تحديد نقطه الانطلاقه لخيال السامع ودى نقطه ذكيه جدا من عدويه علشان يخلى كل واحد يحط نقطه الانطلاقه الخاصه بيه ولو انى اشك ان اى احد من عشاق عدويه يعرف اى حد ساكن فى مصر الجديده
ومن الناحيه الاقتصاديه مثلا نجد المطريه مروه اللى واخده الدنيا بصدرها تقول فى احد اغانيها ( فيها ايه لو اكلم صاحبك .. ليه تخلى الغيره تصاحبك) وهو دليل اقتصادى قيّم للتوفير. فالست مروه عايزه تخدم حبيبها وصاحبه فى نفس الوقت وهى بذلك تكون وفرّت طاقه فتاه اخرى للقيام بنفس المهمه الاقتصاديه المقدسه.
وقد حذى على حذو مروه مطربات كثيرات ذوات عقليه افتصاديه فزّه فشر اتخنها عالم فى الاقتصاد والتوفير. فمنهن نجلا ونانسى وهيفاء واليسا ورغم اختلاف الشكل وحجم الشفايف والاعضاء والقطع البلاستيك المزروعه الا انهم اجتمعوا على الاقتصاد والتوفير فى حجم الملابس المستخدمه. فكلهن اجمعوا ووافقوا انهن يعروّا اجسادهن فى سبيل توفير الخامات الضروريه لصناعه الملابس للمساكين والمحتاجين
وفى نظريه اقتصاديه اخرى للخبير محمد رشدى حيث حمل على كتفيه المشكله السكانيه وخطى خطوات جريئه لم يخطوها خبير التخطيط كمال الجنزورى ففى احدى اغانى رشدى الاقتصاديه قال ( قلبى يا قلبى يابو الحياره.. والله لاعملك شارع وحاره .. واحط نخله م الورد الاخضر وحبه حبه تصبح عماره) يا سلام يا رشدى. مش هيبنى اى عماره جوه قلبه الواسع اوى. دى الشارع اللى هتبقى فيه العماره , هيكون فيه شجر وورد وخضره و ممكن كمان يجيب تصريح من الحى ويعمل نافوره فشر نافوره قصر المنتزه
والى لقاء اخر من الاغانى للرأفتانى مع الاعتذار للأصفهانى الكبير
12 رأى:
:)
هههههههههه
سمعت الاغاني كتير بس اول مرة اوصل للتحليلات دي ، يظهر الاغاني محتاجة اعادة استماع
آه بمناسبة الحاج عبد المطلب كان له اغنية بتقول السبت فات والحد فات وبعد بكرة يوم التلات ميعاد حبيبي
وقد تحيرت كثيرا في اجابة هذا السؤال
في اي يوم قال هذا الكلام؟
تحياتي
ومستنين الجزء التاني
أحمد
ايوه يابو حميد الاغانى بتاعتنا عايزه مجهود علشان نفهمها. وشاكر على تعليقك يا حاج. وان شاء الله تذورنا فى الجزء القادم
اغنيه عبد المطلب المذكوره يحكى انه غناها يوم الجمعه بعد الصلاه. ها افحفر عليها واجيب لك القرار
ههههههههههههههه
قالها قبل مايخش ينام يوم الأحد باليل .
هي هي هي
في كمان زاوية تانية للاغاني و هي زاوية الوقت
يعني لما عدوية يغني في اغنية الزحمة و يقول
الساعة الا تلت و معادي معاه تمانية
يعني بالنسبة لي من قمم البلاغة الشعرية الشعبية
لكن بالنسبة لاغاني اليومين دول مش قادرة افتكر حاجة معينة و يمكن ده لان مبقاش حد يهتم بالوقت من اصله
تحليل ظريف يا رافت
مستنيين الجزء التاني
Ironcobra40
تحليل واقعى لاغنيه الحاج عبد المطلب بس انا ها افحفر زى ماقلت لاحد واجيب قرارها
انت عامل ايه يا مان واخبار الوست كوست ايه
حفصه
جدعه يا حفصه. المثال بتاع عدويه بتاع الوقت تحليل جميل وهى دى دماغ عدويه وان شاء الله ها دور على عوامل تانيه مؤثره فى الحاله العاطفيه الغنائيه
السلام عليكم
ازيك يا حبيب قلبى بعد محا ولا ت كثير ه استطعت الو صو ل اليك بغير اسمى انا محمد يا برنس
الجحيم هو الحقيقه
دخلت بالاسم ده لحد مشوف حل مع جوجل
سلام يا رافت بيه حشوفك تا نى والزيا ره حكررها طبعا
تحياتى
جحيم ومصلوب
ايه يا عم محمد انت جى تخنقنى فى الصفحه بتاعتى يا عم الحاج. هو فيه ايه ياعم مالدنيا مليانه اسامى يا حمام انت مركز اوى مع السواد ليه
شرفت والله ياحمو
الوست كوست تمام ياباشا و بيسلم عليك الجو جميل جدا هنا , أمبارح كان عندتا فسحة خاصة بالشغل و بعد الفسحة أتمشيت أنا وواحد زميلي مصري من شبرا لحد العربية و كنت بأقولة تصدق و أنا بأتمشى عالبحر كنت بأقول لنفسي ياة ريحة الجو عاملة زي ريحة البحر و بعدين رجعت قلت لنفسي اللة أما انت غبي بشكل مانت ماشي جنب البحر , لسبب ما بالنسبة لواحد قاهري زيي مش قادر أستوعب أني ساكن في مدينة ساحلية , أو يمكن لأن البحر في أذهاننا من و أحنا عيال أرتبط بمدينة واحدة بس أسكندرية رغم أن الواحد عرف بعد كدة راس البر و مارينا و ماراقيا و العريش و الغردقة و شرم الشيخ و أوشن سيتي و أتلانتك سيتي و لونج بيتش........ألخ و بعضهم أكثر جمالا و جاذبية من الأسكندرية لكن تفضل في الدماغ مدينة واحدة قائمة كرمز للمصيف الأسكندرية .
أنتوا بقى أية أخبار الجو عندكم في التفاحة الكبيرة باشوف في الأخبار الجو في الساحل الشرقي زي الزفت ربنا يكون في عونكم عشت في الجو دة سبع سنين (مريلاند).
ومش مفتقد أي حاجة فية بس الأسبوع الجاي أنا راجع أقضي الأسبوعين بتوع الثانكس جيفينج مع الأسرة في مريلاند بقالي أربع سنين مارجعتش زيارة من ساعة مانقلت لكاليفورنيا , ربنا يستر و الجو يتحسن و الرحلة تعدي سموز ماتعترضهاش أي ظروف جوية سيئة و أتزنق في مطار متعرفهوش .
Ironcobra40
انتو كده يا بتوع القاهره فاضحنا حتى فى الوست كوست. الميه فجأتك مش واخد عليها. بسن انا فرحان اوى ان اسكندريه لسه الاصل يا مان . وهو ده سحر اسكندريه. الجو فى نيويورك جميل لسه ما احناس تحت الصفر مفيش تلح ولا اى منظر من المناظر دى وانشاء الله الثانكس حيفنك ويك ايند هيبقى تمام لما تيحى تشوف الاسره
شهروزه
شكرا يا باشاعلى ذوفك . ان شاء الله هاكتب الجزء الثانى قريب
بسم الله الرحمن الرحيم
الحقيقه المدونه كلها رائعه ماشاء الله..
عن البوست وددت اضافه ان محمد منير قد حل اشكاليه مساكن الشباب وبكل بساطه حيث اصبح فيها- الاغنيه اعنى - قلبه مساكن شعبيه ..
Post a Comment