الدروس المستفاده من مباراه مصر والجزائر

الفريق المصرى فريق اكثر تدينا من الفريق الجزائرى . لو قرأت اى حديث صحفى لاى لاعب او مدرب مصرى هتلاقيهم بيسألوا الجمهور المصرى التضرع لله بالدعاء . على عكس الفريق الجزائر اللى ما جبش سيره ربنا فى اى حوار صحفى

اتضح ان الاخاء العربى والقوميه والملوخيه وغيرها من المصطلحات بتاعه تعيشى يا بلدى يا بلدى تعيشى . ما هى الا كلام فى الهجايص

تضح ان جمال عبد الناصر مازال قادرا على تعكير دمنا فهو صاحب تظريه القوميه وتحرير الجزائر بلدالمليون شهيد ولولاه كانت باريس هى عاصمه الجزائر

الخسران الوحيد فى الفيلم كله هو مختار الجزائرى الحلاق اللى بنحلق عنده هنا فى نيويورك- كل المصرين قاطعوه

Read More

الاكل .. هو سبب كل المشاكل

 

اتضح ان الاكل هو سبب كل مشاكل الانسان العصرى . واحسن شعور للبنى آدم وهو جائع . وان العقل بيعمل فى احسن حالته لما البطن بتكون شبه فاضيه

فى الايام الخوالى لما الانسان كان بياكل من ورق الشجر والخضار والمكسرات كان الانسان فى احسن صحه وعندما تطورنا وانفتحنا على التقليه والزيت والسمنه البلدى والسكر والمسبك والملبك بدأنا نشوف الضغط والسكر والكليسترول وامراض القلب وغيرها واصيب العقل بحالات غيبوبه فجائيه

ومع تنوع انواع الفول تنوعت اشكال غياب العقل والفكر فمع الفول ابو زيت حار توجد الغيبوبه والتتنيح المؤقت . الفول ابو طحينه وتوم وصلصله يوجد توهان وشبه فقدان للذاكره. درجه نظافه زيت الفلال مرتبطه ارتباط وثيق بعمل خلايا الذكاء فى المخ

وقس على ذلك الكوارع ولحمه الراس والممبار وغيرها من الاكلات التى لها صله ورد فعل دائم مع العقل والذاكره والتتنيح بكافه درجاته

البيت المصرى عامه بيت كريم فنحن من الشعوب القلائل اللى بتقدم المكرونه والبطاطس والارز والعيش مع بعض فى وجبه واحده برغم ان فايدتها الغذائيه واحده

وبعد الاكل بنحلى وبعد الحلوى بناكل فاكهه وبعد الفاكهه بنشرب حاجه ساقعه وبعدها شاى يا قهوه. ومع الشاى والقهوه يا سيجاره يا معسل . وبعد السجاير والمعسل ممكن شويه لب او سودانى

لو واحد اجنبى صديق لك عزمك فى بيته مثلا وسألك تشرب ايه وانت قولت له ماء بس. عادى جدا هيجيب لك الماء وهيعرف انه مشروبك المفضل

لكن لو كان اللى عازمك مصرى وقولت هاشرب ماء بس. هيموت على نفسه من الضحك و هيفتكرك بتشتغله . فلابد ان تأكل اى حاجه وتشرب اى حاجه

واتذكر مره عزمت صديق اجنبى فى البيت والوالده كانت طابخه اكل يكفى محافظه اسكندريه والبحيره مع بعض. وجلسنا على المائده وراحت الوالده مقدمه لصاحبى طاجن ارز معمر اقسم بالله يوكل عيله " وقالت له : ده منابك لازم تخلصه"

صديقى كان هيموت مش من الاكل لكن من منظر الطاجن

Read More

مجــدى كُـــــسبر

 

مجدى كُسبر كان لحّــام حديد .. مدخن وحشاش من الطراز الاول. فى اول يوم رمضان ذهب مجدى الى الحلاق علشان يحلق راسه وذقنه . فرصه ان يضيع نهار اول يوم رمضان فى الحلاقه

جلس مجدى على الكرسى وبدأ الحلاق فى مهامه. وبما انه اول يوم رمضان زاد الحلاق من النزعه الدنييه حبيتين وضع الفوطه على مجدى وبدأ الحلاق قائلا مع كل قصه مقص

بسم الله .. الله اكبر .. يا مسهل يارب

لا حول ولا قوه الا بالله

يا فتاح يا عليم .. اللهم بلغنا رمضان

اعوذ بالله .. اعوذ بالله .. اعوذ بالله

استر يا رب .. سلم يارب سلم

 

وهب مجدى من على الكرسى ثائرا  وخلع الفوطه من عليه قائلا للحلاق

ايه يا عم فى ايه وانت بتحلق للشيطان!!!!!!!! وسب الدين للحلاق ومشى مقتنعا ان لا يخرج من بيته فى نهار رمضان

Read More

البحــــــــــر

البحر المقصود فى العنوان هنا ليس بحر اسكندريه الجميل اللى كل من هب ودب بيروح يحكى له او يشكى له او يرمى فيه اعقاب سجاير وزباله وكوالح الدره وقشر البطاطا والترمس فى الصيف لما اسكندريه يتصبح محتله

البحر المقصود هنا هو صديقى ابراهيم . ولقب البحر ده له حكايه. فابراهيم اسمه الحقيقى ابراهيم غانم لكن محدش يعرفه غير بابراهيم البحر

ابراهيم ايام زمان كان بيروح كفر الدوار يطلع رحلات لبحر اسكنديه وكان باختصار بيلم الفلوس ويعمل تذاكر مضروبه وياخد الفلوس والناس تستنى الاتوبيس الصبح علشان يورحوا البحر .. لكن للاسف مفيش بحر

ومن هنا اخد ابراهيم لقب البحــــــــــر - نظرا للرحلات الوهميه الى بحر الاسكندر

البحر حظه فى التعليم لم يكن اعلى من المتوسط ولكنه مثقف لنوعا ما . وحريص على معرفه التاريخ بشكل مخيف . وفى وسط الكلام ممكن تلاقيه رمى جمله او كلمه كان بيستخدمهــــا ريتشارد قلب الاسد او صلاح الدين الايوبى وغيرهم من علامات التاريخ

بالاضافه الى هؤلاء المشاهير والزعماء البحر بيقوم باختراع جمل وكلمات من صنعه او على الاقل ضاف على الجمل والكلمات الاصليه اضافات من عنده

من اخر اقوال البحر لشرح وتحليل الحاله السياسيه فى مصر

احنا زى اللى  واقفين فى آخر طابور العيش . مستنين نوصل فى اول الصف . ولما وصلنا بعد طول انتظار لاول الصف . الراجل صاحب الفرن ضحك ضحكه خبيثه وقال: العيش خلص خلاص مفيش

واحنا بكل عبط وبحسن نيه مزعلناش ولا قولنا ازاى ولا اليه والعيش راح فين

سألنا صاحب الفرن : يعنى لوجينا بكره بدرى شويه ووقفنا فى الصف م الاول ان شاء الله هنلاقى عيش

صاحب الفرن ضحك نفس الضحكه الخبيه وقال : طبعا طبعا بس ابقى تعالى بدرى

البحر اضاف

انا احلامى بسيطه : السباك يبقى سباك والكمسرى يبقى كمسرى والعجلاتى يبقى عجلاتى

  

Read More

رأس التين المحتــــــــــــــــــــله

خالد صاحبى اضطرته الظروف القهريه ان يسكن مؤقتا مع شاب مصرى اسمه اشـــرف . وشتان الفارق بين الاثنين . بغض النظر عن ان خالد سكندرى واشرف من بنهــــا

فخالد انسان مثقف جدا وقارئ جيد جدا من النيويورك تايمز و الوول ستريت جورنال - يو اس ايه توداى والفاينانشال تايمز . بالاضافه الى انه عاشق ودارس للتاريخ

اما اشرف فعمره ماقرأ اى كتاب غير امل وعمر برغم انه مدرس جغرافيا ثانوى فى مصر!!! ولكن علاقته بالعالم منقطعه .. كل اللى فى دماغه علامه دولار $$$ كبيره جدا . بيشتغل وينام ويدخل الحمام فقط

خالد مره سأله اذا كان عمره راح السينما ولا مسرح ولا اوبرا. طبعا اشرف جاوب بالنفى

اشرف عاش فى نيويورك اكثر من ثلاث سنين مايعرفش فين تمثال الحريه ولا ميدان التايمز

المهم اشرف دخل على خالد فى يوم الشقه بيسب ويلعن وخالد كان بيقرأ النيويورك تايمز تقريبا او كان بتفرج على السى ان ان

المهم سأل اشرف : مالك بتسب وتلعن ليه

اشرف قاله: روحت السفاره المصريه النهارده علشان اعمل توكيل بس السفاره كانت قافله وضاع يوم شغل على الفاضى

فخالد قاله: ان النهارده عيد ثوره يوليو والسفاره قافله بمناسبه الاحتفال

اشرف: قاله انا مختش بالى وقال لخالد انا عاوز اسألك سؤال

فخالد : قاله اسأل براحتك

فأشرف قاله: البلد اللى فى مصر اللى اسرائيل محتلاها دى اللى على الحدود مع اسرائيل . مصر هتخودها امتى؟ يعنى لسه هيكون فى حرب؟؟؟ ولا هنرجعها كده بالمفاوضات

خالد : ساب كل اللى فى إيديه وسأل اشرف وقاله : بلد ايه اللى اسرائيل محتلاها يابنى؟؟

فاشرف: قاله على الحدود مع اسرائيل وقعد يفكر شويه لانه ناسى اسمها

وبعد تفكير عميق اشرف قال لخالد: ايوه افتكرتها : البلد اسمها رأس التين

خالد ما رضش بكلمه واحده ولانى عارف ان خالد مؤدب كنت زمانى حلفت ميت يمين انه شخر له

قام خالد من مكانه ... فاشرف سأله رايح فين؟

خالد قاله : رايح اتصل باهلى فى اسكنديه اشوف هى اسرائيل احتلت قاعده راس التين امتى

Read More

عمــــــــر وسلمى

ذهبت لمحل دى فى دى عربى- نظرا لحاله الحنين لمصر التى تنتابنى غالبا فى الصيف- لشراء افلام عربيه. والمضحك انى باشترى نفس الافلام ! لانى باسلفها لصحابى وعمرهم ما رجعوها . اشتريت البرئ والكيف . وانا بادور على الافلام لقيت فيلم ع الرف اسمه عمــر وسلمى. والحق اقول انى عمرى ما كرهت حد فى حياتى قد تامر حسنى ونادى الزمالك ومفيد وفوزى وزاهى حواس

مكتوب على ظهر الدى فى دى نبذه عن قصه الفيلم

عمر الشاب الجرئ الذى يدخل فى العديد من العلاقات الغراميه . ولكن لاعلاقه تستمر نظرا لحبه للتغير وشعوره بالملل . حتى يقابل سلمى التى تغير حياته. وتستمر الاحداث

وقبل ما اكمل نطق حرف الثاء فى كلمه الاحداث .. اطلقت شخره عصماء فشر التوتو بكر فى عز مجده لما كان بيزلزل حجر النواتيه وجيل نعسه ومينا البصل

احداث ايه اللى هتستمر وعمر ايه وسلمى ايه اللى هتغير حياته . والنبى لما تقرأ النبذه دى عن الفيلم ما تحسش كده ان الفيلم ده اتمثل الف مره قبل كده؟؟ انا نفسى كل واحد يخليه فى شغله وبس. يعنى المكوجى يفضل مكوجى والحلاق حلاق والمهندس مهندس وتامر حسنى يفضل تامر حسنى

Read More

تعريص كرم جابر والفمه الاتحاد من اجل المتوسط

كتب كرم جابر فى روز اليوسف

ذهب مبارك إلى القمةالاوربيه عالي القامة مستندا على دور دولته الضاربة الجذور في الحضارة والوعي والتي تواصل دورها من أجل رفاهية شعبها وإعادة مد الجسر الذي يقود إلى المستقبل وأن تصبح مصر دولة حديثة على الطراز الأوروبي: الحلم ليس مستحيلا واقترب منه محمد علي، ومصر تشهد في السنوات الأخيرة عودة روح البناء والتحديث والتطوير وانهضة الاقتصادية التي يمكن أن تفرش الطريق إلى المستقبل بشرط أن نثق في أنفسنا ولا نشكك في قدراتنا.مبارك أمام قمة الاتحاد من أجل المتوسط كان مستحضرا لتجارب الماضي ومتعايشا انجازات الحاضر ومحددا رؤيته بالنسبة للمستقبل الذي يحلم به لبلاده ولخص ذلك بسؤال ضروري ومهم: كيف يكون الحال في جنوب المتوسط عام 2030 و2050؟ معنى سؤال الرئيس أن مصر ليست غافلة عن التحديات والصعوبات الكبيرة التي يجب أن تستعد لها من الآن حتى تقلل الفجوة من الشركاء الأوروبيين، وتأتي إلينا الأمواج القادمة من أوروبا بالخير وليس الغدر.الهدف في النهاية هو الإنسان ونهضة مصر هي أن يتواصل عطاؤها وأن يبرز من بين أبنائها المهندس والطبيب والعالم والصانع والحرفي الماهر، الذي تحتاجه مصر وأيضا تطلبه أوروبا، الذي شعاره 'أنا المصري كريم العنصرين

والله هذا ما كتبه كرم جابر- وكنت عاوز اشخر واضحك واعمل شكلبظات فى الهوا وحاجات ياما كده. انا عاوز اعرف معنى الحاجات دى

عالى القامه

دور دولته الضارب فى جذور الحضاره والوعى

مصر فى الفتره الاخيره تشهد عوده روح التطوير والتحديث والنهضه الاقتصاديه

مبارك كان مستحضر تجارب الماضى متعايشا مع انجازات الحاضر

تأتى الينا الامواج القادمه من اروبا بالخير

كرم جابر ده يا بيضرب بانجو على سبرته معاهم 3 برشمات صليبه وزجاجه توسيفان يا اما واكل ام الهبل. يا اما والله اعلم عايش فى القاهره اللى فى باريس. بيقولك ان احنا لازم نستعد لتحديات 2030 و2050 يعنى ولى النعم لسه هيفضل معانا ل 2030؟

ارحمنا يا عم جابر الله يرحم امك بأه. تحديات ايه ومستقبل ايه . هو انت وامثالك خليتوا فيها حاجه. دا انتو كرهتنوا فى الكلام والحروف والحبر والورق والقلم. والمصرى كريم العنصرى انت خليتوه المصرى اللى متمرط من اوسخ اصناف البشر

Read More

الفيلم الايرانى - اعدام الفرعون

موضوع الفيلم الايرانى - اعدام الفرعون - دليل اخر على هبل وعبط وهرتله الحكومه الايرانيه اللى عماله تلوش فى الجميع. غرب وشرق شمال وجنوب عرب واجانب. الفيلم الايرانى فيلم وثائقى عن اغتيال السادات وبيحكى انه كان عميل وخاين وان اللى اغتالوه ماهم الاابطال

النقطه هنا مش عن السادات اذا كان بطل ولا فرده كوتش . ولا كان خاين او صدوق. النقطه المهمه هنا ان حكومه العمم الايرانيه حكمت على حاكم مصرى بالخيانه وانه سبب البلاوى اللى احنا فيها دلوقت. وبرغم اختلاف وجهات النظر عن السادات من محبيه او معارضيه . ايران ملهاش انها تحشر مناخيرها وتقول اذا كانت السادات عميل ولا مش عميل . لان الحمد لله مصر مليانه عقول تقدر تحكم على حكامنا وتاريخهم اذا كان اسود ولا ابيض

والحق اقول ان لو الفيلم ده كان اتعمل على ولى النعم - مبارك - برده كنت هاسخن واتنطط كده. لان ايران المفروض تعرف ان اللى بيته من زجاج ما يحدفش الناس بالطوب . ولا تلاقى الملل والعمم اللى هناك حرموا الامثله ومنعوها من التداول

وزاره الخارجيه المعرصه بتاعه احمد ابو الغيط اعترضت . تقوم الحكومه الايرانيه تقول دى حريه . آه والله ايران بتقول حريه . الحكومه الايرانيه اضافت ان اللى انتج الفيلم افراد وليست الحكومه الايرانيه. ما حدش يسمعنى شخره. ايران بتتكلم عن حريه لافراد. من امتى ان شاء الله

الحكومه الايرانيه العبيطه هتفقد اى تعاطف مصرى معاها . ونجادى الحنجورى ده واخد الدنيا بصدره زى هيفاء وهبى كده مع اختلاف جمال الصدر وكميه السليكون اللى فيه

Read More

الثلاثى العبيط

من تعاسه جيلنا وسوء حظه ... انا ربنا سبحانه وتعالى ابتلانا بهذا الثلاثى العبيط ده وده و ده

ايام زمان كان ربنا بيبتليك بواحد اهبل بس قصاده ممكن تلاقى واحد يعنى عنده لسه شويه. بس احنا الجيل بتاعنا ده ضايع من كله. شوفنا العجب. كل اللى ناقصنا هو حرب عالميه كمان ونبقى كده تمام

Read More

وكان يوماً لسب الدين

خرج هانى من مسكنه فى المدينه الجامعيه لملاقه حبيبته الرقيقه إيمــان .. وإيمان فعلا كانت رقيقه كزهره الياسمين. وفى طريقه للقائها وجد صديقه محمد درويش واقف مع صاحبته مروى بيتخانقوا وكل اللى سمعه هانى وهو معدى

درويش كان بيقول لمروى: اصل انتى بنت دين كلب

اصابت هانى صاعقه .. مهما كان وجه الخلاف - ما يصحش ان درويش ييسب الدين لمروى كده- هانى كان يعلم ان درويش عصبى بس مش للدرجه دى

واصل هانى طريقه حتى لا يتأخر على حبيبه القلب إيمان . وعند صعوده الطابق الاول من الكليه وجد على درجات السلم صديق اخر اسمه اشرف الصفتى طابق فى رقبه صاحبته رباب وبيقولها يا بنت دين الكلب! يابنت دين الكلب!يا بنت دين الكلب! ذُهــــل هانى من موضوع سب الدين الشائع بين اصدقاءه فى هذا اليوم الغريب

اسرع هانى من خطواته حتى لا يتأخر عن لقاء إيمــــــــان. وجدها تجلس فى نفس المكان المعتاد وتلقاه بنفس الابتسامه الجميله . سملت عليه وقالت له: صباح الخير يا حبيبى

قال لها هانى : صباح الخير يابنت دين الكلب

نطت ايمان من مجلسها وقالت له انت بتقول ايه

قال لها : اصل الدفعه كلها بتسب الدين لبعض .. وانا فكرت ان دى لغه العشاق النهارده

Read More

تعليقات المدونات ورحله البحث عن المجهول

انه لحدث اعظم من الفتوحات والغزوات ان يوفقك الله وان تسطيع ان تترك تعليق فى مدونه ما. فاليوم معظم المدونات يطلبون منك من المطالب ما تنوء به العصبه اولى القوى. بعد قراءه بوست اعجبك او لم يعجبك وتود ان تبدى رأيك فى هذا البوست تذهب لمكان ترك التعليقات وهنا تبدأ رحله العذاب والبحث عن المجهول . فى الايام الخوالى- كان المطلوب منك هو فقط وضع اسم المستخدم الخاص بجوجل وكلمه المرور وممكن ان تترك التعليق كمجهول- اما الآن فلابد من وضع الآتـــى

• اسمك
• عنوان مدونتك
• ايميلك
• Word Verification
• Math Question

وكان ناقص يقولك تاريخ ميلادك ورقمك القومى والحاله الاجتماعيه والفيش والتشبيه بتاعك

يعنى من الاخر .. لو كنت ناوى تسيب تعليق - خد اجازه يوم من الشغل وودى العيال وامهم عند نسايبك

ده بالاضافه الى رساله موجهه من صاحب المدونه عن نوعيه التعليق الذى يرغب فيه

يعنى مدون يقولك .. هذه مدونه نظيفه وواحد يقولك هذه مدونه بيضاء واخرى سوداء واخر يقولك انا لن اسمح بنشر هذا النوع من التعليق الذى يسيئ الى هذا او ذاك. وآخر عاوز تعليق باسـتك من فوق بس من غير تلبيسه

ومدونات اخرى لابد ان يقرأ صاحب المدونه التعليق اولا قبل نشره فشر ممتاز القط وجماعات الامر بالمعروف

لنفرض مثلا ان شخص ما.. علق تعليق خادش للحياء -هههههه- فباستطاعه صاحب المدونه ان يمسح التعليق فى ثانيه

ولنفرض مثلا ان شخص ما.. ترك تعليق غبى ينم عن جهل عميق .. المفروض صاحب المدونه ان يترك التعليق الغبى حتى يعرف الناس غباء كاتبه

ولنفرض ان شخص ما شتمك تحت اسم مجهول- فهذا يدل على ضعف الشخصيه وتفاهه الهدف

نحن نرغب فى الحريه فى مجالات عده - ولكننا لا نستحقها ما دمنا لا نقبل الرأى الاخر مهما كان غباؤه وجهله

Read More

المجلس الموًقـــــــر

(1)

المجلس المــوّقــــــــر

مفيش اخـــوه ياهــــــوه

لا فـــكّــر يـــوم يفـكـــــــر

ولا يســـأل ليــــه جابــــوه
(2)

سبــــوبه آخــــر حلاوه

يا احـــــــلى م البغاشه

تفويت وقــانون طوارئ

كــــــــله بثمنه ياباشـــا

(3)

قاعدين على الكراسى

ياتنابله الحكـــــــومــــــه

مابين مسطــــــول وناسى

وعويل ما قامت له قومه

(4)

اول ما صاحبنا يســــــــــأل

ســــــــــؤال فى الميكروفـــون

بــهــدوء مـــن غير منـــــاقشه

ومعارضه ويحــــــــــزنـــــون

الكل يرفع ايديه ويقولوا موافقون

ما بلدى هانت عليهـــــــــــــــــــــم

اشمعنا انا مش هـاهـــــــــــــــــــون
**************

نيويورك فى 16 يونيو 2008

Read More

الغاز المصرى فى اسرائيل

الغاز المصرى يبعث الطمئنينه والدفأ فى اســرائيل

عقبال ما يوصل دوله اسيــــوط الشقيقه

Read More

الدنيا ولعت

بعد الغلاء الاخير لاسعار الوقود والسجاير.. هناك افتراح بصرف السجاير على البطاقه التمونيه.. لكل اسره كرتونه سجاير
والناس اللى مش متجوزه لهم عشره سجاير كيلوبترا فرط او خمسه سوبر او حجر معسل

Read More

معترض احمد معترض- شم النسيم

صديقى معترض احمد معترض - دائم الاعترض
يعنى تقوله صباح الخير
يقولك : خير؟ هو هيجى منين الخير
تسأله عن احواله؟
يقولك حال ايه واحوال ايه

اتصلت به فى شم النسيم لاهنئه بعيد الربيع وقولت له كل سنه وانت طيب
ولم اسمع فى التليفون سوى شخره جهوره من صوت رخيم
قال لى: انت فى نيويورك ولا فى عزبه الحاج ابوصلاح
احه احه.. شم نسيم ايه يا بنى؟ انت اهبل
الناس بتحجز تذاكر رحلات الفضاء والقمر .. واحنا لسه بنلون البيض بقشر البصل
احه
وقفل السكه

Read More

الاسعار عندنا وعندهم.. والسكر غلى وانا احلى بإيه

فى عدد ١٦ ابريل صفحه ٦ من جريده الديلى نيوز التى تصدر يوميا فى نيويورك تقرير عن اسعار السلع الغذائيه فى امريكا سنه ١٩٩١ مقاربه باسعار اليوم 2008

شمل هذا التقرير مقارنه بين اسعار السلع الضروريه مثل اللبن والعيش واللحوم وغيرها. وبمناسبه الغلاء الفاحش فى مصر حاولت اعمل مقارنه بسيطه بين نسب زيارده الاسعار هنا فى امريكا ومصر.

مع ملاحظه هامه لابد من وضعها فى الاعتبار ألا وهى : الدولار بالنسبه لنا هنا كالجنيه فى مصر يعنى ماتقارنش فارق العمله حاول تفكر فى الدولار على انه وحده صرف زى الجنيه ماهو وحده الصرف فى مصر. برده وحده الوزن هنا فى امريكا هى الرطل. pound برضه ما تفكرش بين الفرق بين الوحدتين

سعـــر الفراخ سنه ١٩٩١ كان0.90$ دولار والسعر السنه دى 2008 وصل 0.99$ يعنى الزياده 9 سنت. بالنسبه لنا المفروض تكون 9قروش

السكر كان بـ 0.44$ فى سنه 1991 والنهارده سعره وصل 2.99$ بزياده قدره 75 سنت يعنى بالنسبه لنا المفروض تكون 75 قرشا

اللحمه كانت بــ 1.63$ والنهارده السعر اصبح 2.99$ بزياده قدرها 1.36$ يعنى برضه بالنسبه لنا جنيه و36 قرشا

العيش كان بــ 0.73$ والنهارده اصبح بـ 2.19$ يعنى الزياده قدرها 1.46$ .

مش هاتكلم عن اسعار الفاكهه والشيكولاته والمكسرات لانها بالنسبه لنا من الرفاهيات.. علشان الحكومه ترتاح

لاحظ ان فى الــ17 سنه اللى فاتوا مفيش سلعه زاد سعرها الضعف غير العيش.. مع الوضع فى الاعتبار ان المرتبات زادت والحد الادنى للاجور كان 5.5$ فى الساعه من عشر سنين والنهارده الحد الادنى للاجور 7.15$ فى الساعه

بالنسبه لمصر.. على ما اعتقد ان سعر اللحمه من عشر سنين مثلا كان 20 جنيه.. دلوقت اللحمه بحوالى 50 جنيه لو مش لحمه حمير. يعنى السعر زاد تقريبا مره ونصف فى عشر سنين مش 17 سنه.

زجاجه الزيت فى مصر اصبحت بــ13 جنيه وكانت من عشر سنين مثلا بــ3 جنيه يعنى السعر زاد 400%. نفس الزياده الجنونيه بالنسبه للسكر واللبين..اما العيش فهو مشكله تانيه خالص.. لان العيش فى مصر اصبح له شهداء زى شهداء حرب اكتوبر وحرب الاستنزاف

ببساطه: متوسط نسب زياده الاسعار فى امريكا خلال الــ17 سنه اللى فاتت كانت مابين 3%-7% تقريبا.. وهذه الزياده كان معاها زياده فى المرتبات والحد الادنى للاجور وشبه ثبات فى الضرايب.. حتى السنه دى 2008 علشان الاقتصاد تعبان شويه هنا.. قررت الحكومه الامريكيه صرف مساعدات لجميع المواطنين.. كل اسره هيوصلها شيك فى البريد.. قيمه الشيك هتكون على حسب عدد افراد الاسره والاطفال ..الخ

فى مصر متوسط زياده الاسعار خلال الــ10 سنين اللى فاتوا كانت حوالى 300% مع ثبات الاجور والمرتبات ان لم تقل

خاتمه: من غير فذلكه اقتصاديه ومن غير ما الدكتور نظيف عظّم الله اجره ما يلعب فى شنبه.. زياده الاسعار فى مصر لما يقابلها اى زياده فى المرتبات والاجور زى ما بيحصل فى جميع دول العالم حتى جزر القمر.. يعنى لسه المدرس بياخد 100 حنيه فى الشهر وفى ناس لسه بتاخد 400 جنيه فى الشهر.. بالاضافه الى التدهور الرهيب فى نظام التأمين الصحى والمستشفيات وعلاء اسعار الدواء

يعنى لو حبيبت تعمل عمليه جراحيه مش هتقل عن 10 الاف جنيه مثلا ده لو حبيت تطلع بكل اعضاء جسمك اللى دخلت بيهم

المستقبل كاحل السواد.. و الحاضر اسود من قرن الخروب وده يجعلنا فى اشد الحاجه الى النظريه الاقتصاديه الشهيره.. ما اشربش الشاى اشرب ازوزه انا مع تعديل بسيط جدا عليها الا وهو تعديل السكر غلى وانا احلى بأيه

واحا جدا يا حكومه

Read More

جيمى هود علم الواشنطن بوست السرقه

جلس جيمى مع اقرانه فى مجله الواشنطن بوست. فهو مدون مصرى والمدونون المصريون هنا لهم شنه ورنه حيث انهم فى نظر الامريكان رمزا لمقاومه الاستعمار الداخلى وبلطجه امن الدوله وغيرها من مؤسسات الدوله التى لانعمل ماهيه واجبتهم غير مصادره الكتب واعتقال الابرياء ووضع العصى فى مؤخرات الوطن.
جلس جيمى مع اصحابه فى الواشنطن بوست يشرح لهم كيفيه تحميل اى برنامج فى العالم من غير دفع مليم احمر. شرح لهم كيفيه الحصول على الكود الخاص بأى سى دى للفوتوشوب وادوبى وغيرها من البرامج الغير رخيصه.
باختصار جيمى شرح لهم كيفيه سرقه اى برنامح!!!!! وحيث ان قانون حقوق الملكيه الفكريه هنا ذو شأن عظيم اصبحت الوجوه شاحبه والنفوس مليئه بأسئله عديده. نظر جيمى الى الوجوه الخائفه قائلا:
نحن شعب فقير ولانستطع شراء برامج ب500 او حتى 100 دولار. وهذه البرامج ضروريه لنا كمدونين. فنحن نستخدمها فى تصميم شعار مظاهره او تصميم بانر للمطالبه بالافراج عن سجين للرأى او الحريه. تغيرت نظرات المحيطين بجيمى الى اعجاب وامتلأت الغرفه بالتصفيق الحاد نسى الجميع ان لو مايكروسوفت علم بوجود جيمى فى الواشنطن بوست لامر بحرق الجريده بما تحوى.

Read More

نجيب محفوظ بالدولار

فى أخر زياره لى لمصر اهدتنى اعز الاصدقاء مجموعه كتب لنجيب محفوظ بعد ان شكوت لها اننى قد قرأت معظم كتب نجيب محفوظ بالانجليزيه ولم اقرأ اى كتاب له بالعربيه. قرأت اول كتاب وشعرت بالفرق بين كتابه نجيب محفوظ بالعربيه وبين ماقرأته بالانجليزيه ووجدت نفسى االتهم كتابا تلو الاخر وقبل ان انتهى من قراءه  آخر كتاب ذهبت لمكتب الاهرام فى نيويورك لشراء مزيد من كتب نجيب محفوظ باللغه العربيه. ودخلت المكتب المعود .قضيت به اكثر من ساعتين واختارت العديد من الكتب. وعند ذهابى لدفع ثمن الكتب وجدت ان مجموع اسعار الكتب وصل حوالى اكثر من 300 دولار. تعجبت ومسكت احد الكتب ووجدت ان سعر اغلى كتاب فى الكتب كان عشره جنيهات!!! فسألت الموظفه كيف وصل السعر ل 300 وان معظم اسعار الكتب ما بين خمسه الى عشره جنيهات فقالت لى فرق الشحن وفرق العمله!!!! وضربت كفا على كف وقلت لها ان فارق العمله المفروض يكون لصالح الدولار وليس العكس فلم ترد على باجابه مقنعه

دفعت ثمن الكتب وخرجت من المكتب اسب الدين لنجيب محفوظ ولاولاد حارتنا ولللاهرام والاخبار والجمهوريه واليوم اللى اتعلمت فيه القراء والكتابه و العن صديقتى التى قدمت لى نجيب باللغه العربيه فقد كنت راضيا سعيدا بما اقرأ من كتب بالانجليزيه

Read More

الحمله الرأفتانيه .. ضد الحملات التانيه

ناوى اعمل حمله شرسه ... بس مش عارف عن ايه لسه ...باحضر البانرات والشعارات وبافضى ركن فى المدونه علشان جمع التوفيعات

وبعت رسايل للناس جميعا علشان يحضروا للمظاهرات .. والهتافات

وصديق لى هيروح للمفتى يجيب فتوى ان اللى مش هيوقع .. هيروح النار .. ودمه حلال وانه عدو للحريه والوطنيه والقوميه والشرابيه وفراخ الجمعيه

ادعو لى بس اعرف الحمله هتكون عن ايه

Read More

شهيناز النجار عضو سيد قراره بتستقيل

استقاله شهيناز النجار عضو مجلس الشعب عن دائره المنيل تعتبر اول استقاله لمسؤل مصرى او عضو فى مجلس الشعب..الله اعلم ماهى دوافعها للاستقاله..بعض الناس بيقولو ان احمد باشا عز زوجها هو اللى طلب منها الاستقاله.. وطبعا انا لو مكان شهيناز..ملعون ابو المجلس فى ظل امان وفلوس ونفوذ احمد عز.. لكن الاستقاله فى حد ذاتها حاجه كويسه.. عضوه فى المجلس الموقر بتستقيل لوحدها..الظاهر ان التناحه السياسيه لم تؤثر فى هذه السيده..حاكم احنا عندنا فى اعضاء مجلس الشعب والمجالس الحكوميه..اول ما المسؤل من دول يقعد على الكرسى يحلف ميت يمين..انه هيخدم الشعب حتى اخر قطره فى الدم ونبضه فى القلب.. طاب يا عم الحاج المعاش وحالتك الصحيه وظروف البلد اللى اسود من قرن الخروب..مليش دعوه انا عاوز اخدم لحد اخر قطره واخر نبض .. وبيقعد صاحبنا من دول على قلوبنا لحد ما يتحبس او يموت او احنا نموت او نهاجر.. وبعد الهجره نرجع البلد نلاقيه برده قاعد بيخدم لحد اخر قطره واخر نبضه

بمرور السنين بيكتسب النائب من دول خبره سياسيه وطبقه سميكه على الجلد اسمها التناحه والتلامه السياسيه ودول مختلفين عن الكرش السياسى اللى بيطلع فقط بعد اول مليون قطره واول مليون نبضه ما يدخلو البنك

Read More