كـــــل سنــــــه وانتوا طيبين
Showing posts with label الرأفتانى الاجتماعى. Show all posts
Showing posts with label الرأفتانى الاجتماعى. Show all posts
Thursday, August 28, 2008
Wednesday, July 30, 2008
ادخلوها آمينين
الموضوع اللى ظهر اخيرا عن نسبه السيدات ضحايا التحرش فى مصر اصبح موضوع مثير للخجل والعار. 98% من السيدات الاجنبيات الاتى قمن بزياره مصر تم التحرش بهن و83% من السيدات المصريات يتم التحرش بهن يوميا. والشئ المؤسف ان الحكومه المعرصه كالعاده لم يقم لها قامه. والبوليس اللى كل همه يحجم حريه الشعب لم ولن يهتم بتلك الحوادث اللى زى ما بيقولوا حوادث فرديه و مش ظاهره. رقم ال %83 ده هو رقم السيدات اللى قدموا شكاوى عن موضوع التحرش. واكيد فى هناك العديد من السيدات اللاتى خجلن من تقديم الشكوى
وبخلاف الموقف المؤسف من الدوله البولسيه . الرجاله والشباب اللى بيتحرشوا دول ليس بهم من الرجوله ما يذكر. ايام زمان كان فى نخوه وشهامه معروفه فى مصر. لكن للاسف الآن الكثير من انصاف الرجال من امثال توتو ولولو وهوهو وشباب علق كده لو فتحت دماغ اي واحد منهم هتلاقى بدل المخ واحده ست عريانه. كل اللى بيفكروا فيه لا مؤاخذه هو عضوهم الذكرى ده اذا كان موجود اصلا. واى واحد يلوم السيدات فى موضوع التحرش ده فهو ناكر للحق. فأى بنت واى ست فهى حره تلبس اللى تلبسه وتقلع اللى تقلعه. ده اختيارها هى. وانت مش من حقك تعاقبها بما لبست او قلعت لان موضوع القلع واللبس ده علاقه بينها وبين ربنا. ربنا للى بيحاسب مش انت. اذا كانت هى فى نظرك مش محترمه فخليك انت محترم
والحق اقول لما اخجل يوما من كونى مصريا كخجلى يوم وجدت تحذير على الموقع بتاع وزاره الخارجيه لاحدى الدول الغربيه لرعاياها من السيدات من زياره مصر نظرا لزياده نسبه التحرش الجنسى
هكذا اصبحنا كالحيوانات فى نظر الدول الاخرى. حتى براميل البترول فى الخيلج اصبحوا ينظروا الى مصر كمرتع جنسى
الحل الآن اصبح فى يد السيدات والقله القليله من اصحاب النخوه والرجوله. اى واحد ست يتم التحرش بها المفروض تمسك الشخص اللى اتحرش بها وتطلع دين امه . طالما الحكومه مش فى دماغها
Tuesday, July 22, 2008
احتفال كالفورنيا بعيد 23 يوليو
ده صوره الخطاب اللى بعته حاكم ولايه كالفورنيا ارنولد شوارزنجر للسفاره المصريه بمناسبه الاحتفال بيوم مصر فى كالفورنيا
Thursday, July 3, 2008
وكان يوماً لسب الدين
خرج هانى من مسكنه فى المدينه الجامعيه لملاقه حبيبته الرقيقه إيمــان .. وإيمان فعلا كانت رقيقه كزهره الياسمين. وفى طريقه للقائها وجد صديقه محمد درويش واقف مع صاحبته مروى بيتخانقوا وكل اللى سمعه هانى وهو معدى
درويش كان بيقول لمروى: اصل انتى بنت دين كلب
اصابت هانى صاعقه .. مهما كان وجه الخلاف - ما يصحش ان درويش ييسب الدين لمروى كده- هانى كان يعلم ان درويش عصبى بس مش للدرجه دى
واصل هانى طريقه حتى لا يتأخر على حبيبه القلب إيمان . وعند صعوده الطابق الاول من الكليه وجد على درجات السلم صديق اخر اسمه اشرف الصفتى طابق فى رقبه صاحبته رباب وبيقولها يا بنت دين الكلب! يابنت دين الكلب!يا بنت دين الكلب! ذُهــــل هانى من موضوع سب الدين الشائع بين اصدقاءه فى هذا اليوم الغريب
اسرع هانى من خطواته حتى لا يتأخر عن لقاء إيمــــــــان. وجدها تجلس فى نفس المكان المعتاد وتلقاه بنفس الابتسامه الجميله . سملت عليه وقالت له: صباح الخير يا حبيبى
قال لها هانى : صباح الخير يابنت دين الكلب
نطت ايمان من مجلسها وقالت له انت بتقول ايه
قال لها : اصل الدفعه كلها بتسب الدين لبعض .. وانا فكرت ان دى لغه العشاق النهارده
Saturday, October 20, 2007
بــأمر الدكتــــور
ممنوع السجاير
ممنوع القهوه
ممنوع الشاى
ضحكت بداخلى وسخرت من علمه وشهاداته
فتلك هى هواياتى فكيف اعزف عنها
سألت سؤال خبيث وقولت له يا دكتور اشرب عصير ليمون وبرتقال
قالى آه ده يبقى كويس خالص
شكرته ومشيت بسرعه لا يقولى ابقى اشرب عسل نحل ولبن دافى
Sunday, September 23, 2007
مطار القاهره و مصر للطيران والحمّام بتاع مطار برشلونه
مطار القاهره الدولى اشبه بالوسيه او العزبه اللى ملهاش صاحب. وفى مواسم السفر والاجازات بيكون مثل حديقه الحيوانات او مولد المرسى ابو العباس. اللافتات اللى فى المطار معموله علشان تلخبط الناس واللى رحلته فى المطار القديم هيلاقيها طالعه من المطار الجديد واللى رحلته طالعه من المطار الجديد هيلاقيها طالعه من برج العرب او السلوم. ولا ادرى الحكمه فى مطار قديم ومطار جديد وازاى مطار عاصمه دوله فى 80 مليون بنى آدم يكون بالطريقه دى. ما عليك من التناحه بتاعه العاملين فى المطار وكل امين شرطه منهم مفكر نفسه زكى بدر او الزينى بركات. ولا ادرى ما الحكمه فى ان امناء الشرطه وضباط الجوازات كلهم بيلبسوا زى عسكرى اسود يثير الرعب فى قلب كل مسافر. وعلاقه امناء الشرطه وضباط الجوزات باللغه الانجليزيه عامله كعلاقه ام على بتاعه الجرايد بالكمياء النوويه وابحاث الفضاء. فضايح..تلاقى الشحط من دول قاعد فى الكشك الزجاج وقاعد يشوح بايده للسياح والمسافرين زى الصم والبكم فى برنامج القلوب
الرحيمه
لو حظك اسود تكون حاجز على خطوط مصر للطيران اللى عامله زى اتوبيس غرب الدلتا . وبرده المضيفات والمضيفين معوجين عواجان لا مثيل له وكلهم طبعا شغالين بواسطه فى العزبه. اتذكر ان فى احدى الرحلات التعيسه على خطوط مصر للطيران اتلطعنا فى ممر الاقلاع بتاع ساعه وفى واحده ست كبيره فى السن عاوزه شويه ميه علشان تاخد برشامه السكر فسألت شحط من المضيفين فقالها انه ممنوع اى مشروبات لحد الاقلاع . والست الكبيره مفرهده على الاخر وجالها كرشه نفس. فراح واحد من الركاب ساخن على المضيف الشحط وقام هذا الراكب وراح بنفسه جاب للست الميه علشان تاخد البرشامه
وفى احدى الرحلات السعيده فى طريقى لالمانيا على خطوط لوفتهانزا كان فى طفل قاعد جنبى هو وامه. وطلب الطفل من المضيفه الالمانيه قطعه شيكولاته كانوا بيوزعوها دايما على الخطوط الالمانيه وبعد دقائق رجعت المضيفه وكلها أسف تعتذر لهذا الطفل عن عدم وجود الشيكولاته اللى هو طلبها واحضرت له بتاع 15 نوع آخر من الشيكولاته واللعب والكتب. وبعد عشر دقايق حضرت كبيره المضيفات تعتذر للطفل عن عدم وجود نوع الشيكولاته المطلوب. وكل عشر دقايق مضيف او مضيفه يجى يسأل الطفل لو محتاج حاجه تانيه. وبعد وصولنا لفرانكفورت الكابتن بتاع الطياره استنى الطفل على باب الخروج واعتذر له وعرض على الطفل انه يجى يلعب فى كبينه الطيار شويه. وفرح الطفل ودخل الكبينه وامه قعدت تصور فيه. شوفتوا الخدمه عامله ازاى يا بهايم مصر للطيران
المهم فى الرحله الاخيره بعد معاناتى فى مطار القاهره وصلت برشلونه اسبانيا واجراءات دخولى برشلونه ما اخدتش اكثر من 5 دقايق ولما دخلت الحمام فى المطار عنيه كانت هتدمع من الفرحه من نظافه الحمام اللى كان عامل زى مدخل وزاره الخارجيه فى مصر. والحمام كان فاضى مفيهوش واحد واقف على الباب عاوز بقشيش. طلعت من الحمام احمد ربنا واشكره على اختراع الطياره اللى خلانى اشوف مطارات تانيه غير مطار القاهره القديم والجديد والمايل والمعدول
Sunday, September 16, 2007
خليك سيئ الظن
لى صديق يقول لى دائما - خليك سيئ الظن
اقوله ازاى يعنى
..قال لى مش فى القانون بيقولو ان المتهم برئ حتى تثبت ادانته؟
قولت له ايوه
قالى خلى مبدأك ان الجميع مذنبون حتى يثبتوا العكس. بالطريقه دى عمرك ما هاتزعل لما تلاقى واحد واطى لكنك هتفرح لما تلاقى واحد مش واطى
وفى ا مريكا احنا هنا دايما بنقولو
have low expectations
يعنى ما تتعشمش قوى علشان لو العمليه طلعت على فاشوش تكون انت مستعد مسبقا
Wednesday, July 18, 2007
إيـــرل ذو السبعون خريفا
يعمل معى فى احد الاقسام رجل اسمه إيرل يبلغ من العمر ما يقرب من السبعين سنه .. به حيوه ونشاط شاب فى العشرين .. إيرل يعمل فى
الفتره المسائيه وهى الاصعب .. وايرل من اقدم الموظفين فى الشركه ومن حقه ان يعمل الفتره الصباحيه اذا اراد لكنه رفض.. وقال لى ان
الفتره الصباحيه للناس الكسالا وهو ليس بكسول .. سألته متى ينوى ان يطلع على المعاش .. فقال لى لماذا؟ انا احب العمل وما زلت قادر على العطاء .. قانون البلد هنا يمنع التفرقه على اساس الدين , اللون , الجنس والسن . يعنى لا احد يستطيع ان يجبر إيرل على الطلوع على المعاش
ما شدنى هو نظره المجتمع الامريكى للسن.. لا احد يبالى اهتماما بعدد سنين عمرك طالما انت قادرا على العمل .. لا احد يهتم بعدد الشعرات البيضاء. ودائما اذكر نفسى بالفرق بين نظره مجتمعنا العربى والمجتمع الامريكى لكبار السن. فى مصر بعد الوصل لسن الاربعين يبدأ الناس فى نداءك باسم حاج حتى واذا لم تحج. وايضا قبل وصول سن الاربعين يقتنع الشباب فى مصر ان العظمه كبرت وخلاص يلا حسن الختام
اتذكر فى بدايه قدومى لنيويورك كنت اعمل فى محل ما.. وجاءت امرأه تبلغ من العمر الثمانين مثلا .. وسمعتها تقول لزميلى فى العمل ان يسرع فهى متأخره على ميعاد عملها!! ذهبت لزميلى فى العمل وتأكدت منه فعلا ان هذه السيده فى طريقها للعمل.. 80 سنه ولسه بتشتغل..وقال لى وجايز تلاقى عندها بوى فريند كمان.. رحم الله جدتى مات فى سن ال 53
ما شدنى هو نظره المجتمع الامريكى للسن.. لا احد يبالى اهتماما بعدد سنين عمرك طالما انت قادرا على العمل .. لا احد يهتم بعدد الشعرات البيضاء. ودائما اذكر نفسى بالفرق بين نظره مجتمعنا العربى والمجتمع الامريكى لكبار السن. فى مصر بعد الوصل لسن الاربعين يبدأ الناس فى نداءك باسم حاج حتى واذا لم تحج. وايضا قبل وصول سن الاربعين يقتنع الشباب فى مصر ان العظمه كبرت وخلاص يلا حسن الختام
اتذكر فى بدايه قدومى لنيويورك كنت اعمل فى محل ما.. وجاءت امرأه تبلغ من العمر الثمانين مثلا .. وسمعتها تقول لزميلى فى العمل ان يسرع فهى متأخره على ميعاد عملها!! ذهبت لزميلى فى العمل وتأكدت منه فعلا ان هذه السيده فى طريقها للعمل.. 80 سنه ولسه بتشتغل..وقال لى وجايز تلاقى عندها بوى فريند كمان.. رحم الله جدتى مات فى سن ال 53
Thursday, June 28, 2007
دردشــــــــــــه مع جدوووو
سعدت كثيرا بسماع صوت جدووا العزيز
اتصل بى جدوا الطيب ليطمئن على حالى ... تكلمنا فى اشياء عديده.. قال لى انه عاش فى نيويورك اكثر من 13 سنه قبل ما يروح تكساس.. قال لى ان الناس فى تكساس طيبين غير ما كنت انا متصور ... قولت له انى باكره القاهره بالنهار وباحبها بالليل فقط .. قال لى انه مره راح اسكندريه وازاى ان سحر البحر اخده وفاضل ماشى لحد ما لقى نفسه فى الميه بهدومه
جدووو زعلان وسألنى وقال عاجبك اللى بيحصل بين الاقباط والمسلمين فى مصر؟؟ قولت له لأ مش عاجبنى... وقولت له ان فى مجموعات جاهله من الجانبين تقوم باحياء الفتنه وتفجير النفوس.. قالى ان للاسف اللى بيقوم باحياء هذه الفتن هم اناس مثقفون وعلى وعى بما يفعلون
جدووو قالى انه وهو صغير عمره ما حس ان فى فرق بينه وبين اى شخص يدين بدين آخر..قالى ان الجيل بتاعه كله نشأ وتربى على السماحه والحوار واحترام الغير.., العيب فينا يا جدوو العبيب فى جيلنا
جدووو قالى ياريت كل واحد يبدأ بنفسه ... فترقبوا مدونه جدوووو لبدايه الحوار
اتصل بى جدوا الطيب ليطمئن على حالى ... تكلمنا فى اشياء عديده.. قال لى انه عاش فى نيويورك اكثر من 13 سنه قبل ما يروح تكساس.. قال لى ان الناس فى تكساس طيبين غير ما كنت انا متصور ... قولت له انى باكره القاهره بالنهار وباحبها بالليل فقط .. قال لى انه مره راح اسكندريه وازاى ان سحر البحر اخده وفاضل ماشى لحد ما لقى نفسه فى الميه بهدومه
جدووو زعلان وسألنى وقال عاجبك اللى بيحصل بين الاقباط والمسلمين فى مصر؟؟ قولت له لأ مش عاجبنى... وقولت له ان فى مجموعات جاهله من الجانبين تقوم باحياء الفتنه وتفجير النفوس.. قالى ان للاسف اللى بيقوم باحياء هذه الفتن هم اناس مثقفون وعلى وعى بما يفعلون
جدووو قالى انه وهو صغير عمره ما حس ان فى فرق بينه وبين اى شخص يدين بدين آخر..قالى ان الجيل بتاعه كله نشأ وتربى على السماحه والحوار واحترام الغير.., العيب فينا يا جدوو العبيب فى جيلنا
جدووو قالى ياريت كل واحد يبدأ بنفسه ... فترقبوا مدونه جدوووو لبدايه الحوار
Thursday, January 11, 2007
انا وابن عمى
لى ابن عم فى سنى..وكان دايما معى فى نفس الفصل ونفس المدرسه لحد اول ثانوى عام كده لما انا سافرت
خالد ابن عمى كان مهمل شويه.. يعنى مفيش كتب مفيش كراسه مفيش قلم.. عادى يعنى.. كان بيجى الفصل اثبات حاله وكأنه بيعمل جميل فى وزاره التربيه والتعليم
وكان لنا مدرس رسم اسمه الاستاذ حافظ.. وكان الاستاذ حافظ مفكر نفسه بيكاسوا .. وكان بيصدعنا بالفن والفنانين ولوحات .. ومتاحف وغيرها من الحاجات اللى بتخنق.. وكان نص الفصل يا اما بيذاكر ماده تانيه مهمه.. يا اما بيشربوا سجاير ورا
المهم ان فى احدى الحصص.. الاستاذ حافظ زعل ان خالد ابن عمى ماجبش كراسه الرسم ولا الالوان بتاعته.. والاستاذ حافظ وقف خالد فى وسط الفصل وقاله
انت ليه مش زى ابن عمك الرأفتانى ملتزم وبتجيب اداوات الرسم معاك
وأنا قاعد جنب خالد والاستاذ حافظ قاعد يهزأه وخالد ابن عمى اتخنق منه ع الاخر
والاستاذ حافظ قالى يا رأفتانى.. انا احترت مع ابن عمك ومش عارف اعمل ايه معاه.. ياريت تخليه يلتزم زيك
انا كان لازم انقذ الموقف لان خالد كان على شفا انه يطلع المطواه ويخبط الاستاذ حافظ سن ويريح المدرسه والمنطقه التعليميه من قرفه
اقوم انا اعمل ايه؟
اقوم اقلع الجزمه وافقع خالد ابن عمى جزمتين على دماغه
واقوله : كده يا ابن الكلب... كده
جايب لنا الكلام من اللى يسوه واللى ما يسواش
خالد ابن عمى نام ع الارض من الضحك
وانا شغال ضرب بالاقلام والجزمه وهيصه ما تقولش عركه فى سوق زنانيرى
الاستاذ حافظ قعد يسلك فينا ويقولى خلاص ... الكلام ده فى البيت مش هنا... خلاص كده كفايه
وانا اقول .. لا يا استاذ حافظ .. لا انت مش عارف الولد ده بقله التزامه عامل ايه فى والده؟ دا عمى خلاص غلب معاه وقرب يموت
وصممت ان اخد خالد واروحه البيت علشان اكمل العلقه هناك ويكون ابوه حاضر المعركه
ووافق الاستاذ حافظ.. ما هو عاوز يخلص مننا... وطلعت انا وخالد طيران على قهوه عم حسنى نستنى مدرسه البنات لما تطلع
Friday, January 5, 2007
فى ذكــريات تحضير الشنط
الحاجه ام الرأفتانى.. اطيب من الطيبه.. وده يرجع لجذورها الريفيه الكريمه..فرغم زحمه المدن من اسكندريه والقاهره وحتى السفر لنيويورك..الا انها مازلت الست الطيبه اللى بتحب الناس كلها..والحاجه لما تفرح تعيط..ولما تزعل تعيط..لما اسافر واسيبها تعيط..لما ارجع م السفر تعيط...اخود البكالريوس تعيط..ماجستير تعيط..وده سبب خلانى افكر جادا انى اعمل الدكتوراه..يمكن تغلط وتزغرط
واتذكر مره واحنا فى نيويورك..كنا رايحين مطعم وكان فى ناس يهود..وقلت لها ان الراجل اللى قاعد ورانا ده..يهودى.. فالحاجه مصمصت على شفايفها... وقالت يا عينى..يا حول الله يا رب.. ما تقولش ان الراجل عنده جرب ولا حاجه
والحاجه طيبه اوى.. وفاتحه البيت بتاعنا وكاله..اللى الرايح واللى جاى يدخل ..ولازم تحلف ميت يمين انهم لازم يكلوا.. او يشربوا ..وفى اغلب الاحيان..لازم يكلوا ويشربوا.. ولو كان مسموح كانت تحميهم كمان.. وانا لما كنت بابعت حاجات من نيويورك هنا مع اصحاب لى نازلين مصر..كنت با حذرهم ..انهم مايكلوش يومين قبل مايروحوا للحاجه..علشان الحاجه لازم تطبخ لهم.. وبناء عليه كل اصحابى هرشوا الفيلم.. وبقوا يروحوا البيت عندنا واقعين من الجوع وبناء على طيبه قلب الحاجه.. كل اصحابى بنين وبنات حسوا بالاطمئنان لها وارتاحوا لها خالص ..فساعات اكون انا بره البيت ..وارجع متأخر..وادخل البيت الاقى واحد صاحبى حلوف نازل اكل ماتقولش انه فى موائد الرحمن..واسأله انت هنا من امتى.. يقول لى من فتره..عادى يعنى..قيمه طبقين رز وطبق بطاطس واحيانا اخرى ادخل البيت الاقى واحده صديقه قاعده مع الحاجه والاثنين نازلين سح سح سح.. خير يا جماعه.. كانت صديقتى دى بتشكيلها من خطيبها او جوزها او انها تعبانه فى شغلها
والحق اقول..انا لما انزل مصر اجازه..بأنزل فى فنادق..وباحجز للحاجه معايا علشان نتفادى اصدقائى من الحلاليف الجياع لمده معينه..بس بعد يومين بالكتير الحاجه بتحن للبيت لان الناس وحشوها والجيران.. وبناءا عليه نسيب الفندق وارجع البيت اتفرج على اصحابى وهما بيكلوا اويجوا يعيطوا من هجر الحبيب خلاص هانت..ان شاء الله.. هاشوف الحاجه..واللى مزنوق يبقى يقولى وانا اخليها تدعى له
والحق اقول..انا لما انزل مصر اجازه..بأنزل فى فنادق..وباحجز للحاجه معايا علشان نتفادى اصدقائى من الحلاليف الجياع لمده معينه..بس بعد يومين بالكتير الحاجه بتحن للبيت لان الناس وحشوها والجيران.. وبناءا عليه نسيب الفندق وارجع البيت اتفرج على اصحابى وهما بيكلوا اويجوا يعيطوا من هجر الحبيب خلاص هانت..ان شاء الله.. هاشوف الحاجه..واللى مزنوق يبقى يقولى وانا اخليها تدعى له
الدعوه بدولار
Friday, December 29, 2006
كل سنه وانتوا طيبين
قرار رأفتانى غاشم
بالغاء عيد الاضحى والكريسماس وراس السنه واعياد الميلاد لهذا العام ودمجها جميعا مع عيدى الشرطه وعيد القمح
وكل عام وانت بصحه وخير
Monday, October 23, 2006
كل سنه وانتوا طيبين
عيد مبارك
وجمال مبارك
وسوزان مبارك
وعلاء مبارك
وانا وانتا
وجمال مبارك
وسوزان مبارك
وعلاء مبارك
وانا وانتا
وسمعنى سلام ليه يا حبايب حلى ذادى ومررتوه
Tuesday, October 17, 2006
الوقت لا يعنى شئ
فى بلاد الهجره هنا فى مميزات كتيره وطبعا فى عيوب. العيوب ممكن تتفادها لو انت مشيت فى طريقك عدل. والمثل بيقول امشى فى طريقك عدل يحتار عدوك فيك. لكن المميزات كتيره. و من اهم خصائص المجتمع الامريكى هو احترام المواعيد. ومواعيد الدكتور ممكن تكون 5:15 او 8:10 وكذلك مواعيد القطارات والافلام وهكذا. والمهاجرين المصرين منهم اللى يبتعود ع النظام ده ومنهم اللى لسه ماشى على نظام يا اهل المحبه ادونى حبه. فمثلا فى نوعيه من المصريين لايزال عمل بنظام بعد الظهر وبعد العصر. يعنى يديك ميعاد ويقولك اشوفك بعد العصر. وبعد العصر دى معناها من الساعه 4 لحد اذان المغرب ومعال ربنا اتلطع لك اربع او خمس ساعات. الاحساس بالوقت معدوم. فمثلا واحد يقولك انا رايح مشوار قيمه ساعه. وقيمه الساعه دى المفروض انها 60 دقيقه مع اى حد فى الدينا الا نوعيه معينه من المصرين. قيمه ساعه يعنى ست سبع ساعات. واى صاحب محل مصرى هنا فى نيويورك بيفتح المحل بعد الظهر الفتره الصباحيه مش موجوده او اتلغت من دفتر المواعيد ويفضل فاتح لنصف الليل لما الشوارع بتكون فاضيه تماما. وفى اخر السنه بيشتكوا انهم بيعملوش فلوس. طاب ازاى تعمل فلوس وانت فاتح والناس نايمه وقافل والناس صاحيه. الحق اقول ان فى ناس كثيره اتعودت ع النظام ونجحوا نجاح كبير فى مختلف المجالات
كلام جرايد
قرأت فى جريده الوفد المصريه
ان هناك 5 ملايين مصرى بالخارج محرمون من حق الانتخاب
ومت على نفسى من الضحك لان فى مصر اكثر من 60 مليون محرومون من حق الانتخاب برده
فى جريده المصريون الاحرار الاكترونيه
قررت مؤسسة ساويرس الاجتماعية، والتي ترأسها السيدة لوزة ساويرس والدة رجل الأعمال نجيب ساويرس، التبرع بـ 10 مليون دولار لصالح المسيحيين في جنوبي السودان؛ وذلك في صورة مساعدات عينية، كما تقرر فتح حساب للتبرع لهم في ظل ما يعانونه من أوضاع معيشية سيئة
ياللاه اى خدمه يا جدعان معلون مصر واللى فيها
فى جريده المصريون الاحرار الاكترونيه
وصف الرئيس الإيراني محمود أحمدي نجاد نظيره الأمريكي جورج بوش بأنه "يتلقى الوحي من الشيطان". وقال أحمدي نجاد أمام حشد من مناصريه إنه يتلقى هو الوحي من الله، وإن الله يظهر المعجزات لمن يؤمن حقا به. ونقل الإعلام الإيراني عن أحمدي نجاد قوله أن بوش "أيضا يتلقى الوحي، لكن من الشيطان
ايوه يا عم نجادى مهى العمليه ناقصه هبل والعيب مش عليك العيب على العبط اللى قعدول يهيصوا لك
اعترفت سميرة الطيب وكيل الوزارة ووكيل مديرية التربية والتعليم بمحافظة القاهرة، بوجود نسبة كبيرة من الطلاب بالمرحلة الابتدائية لا يعرفون القراءة ولا الكتابة
أقطع دراعى لو كانوا المدرسين بيعرفوا يقروا هما كمان
شعبان عبد الرحيم يستعد لتسجيل اغنيه للرد على بابا الفاتيكان
معلش يا شعبولا احنا متقلين عليك شويه انت مش عارف تلاقيها منين ولامنين دنمارك واسرائيل البابا. بجد يعنى حسك معانا لحد ما نلاقى راجل تانى جنبك
Wednesday, September 13, 2006
شفت فى لندن
متظاهر اسمه براين هو. ناصب خيمه امام حديقه البرلمان البريطانى من سنه 2001. براين بدأ اعتراضه وتظاهره على الاوضاع الاقتصاديه فى بريطانيا بعد احتلال العراق. نظره براين بدات تتغير وبدأ يتظاهر اعتراضا على قتل الابرياء فى العراق وافغانستان
الدنيا هاجت وعم براين انشهر والصحافه فى كل انحاء الدنيا استضافته الا الصحافه المصريه طبعا والناس من كل الدول بدأو يرسلول رسائل شكر وتشجيع واليافطه الواحده اللى براين بدأ بها إعتصامه اصبحت 100 يافطه والصوره الواحده اصبحت 1000 صوره والموضوع كبر على الاخر. بعض اعضاء البرلمان من المعارضه اصبحوا من المؤيدين لبراين
الحكومه البريطانيه حاولت بشتى الطرق انها تهد الخيمه بتاعه براين وتشيل الافتات والصور لكن هيهات براين راسه والف بلغه قديمه ان ده حقه الدستورى كمواطن بريطانى
فى اكتوبر 2002 الحكومه البريطانيه رفعت قضيه على براين علشان يمشى من الميدان ويشيل الخيمه لكن المحكمه البريطانيه حكمت لصالح براين ان ده حق التظاهر مكفول للجميع
فى سنه 2005 الحكومه البريطانيه فصّلت قانون جديد يمنع التظاهر امام البرلمان فى مسافه اقل من كيلو متر
فى شهر اغسطس 2005 المحكمه البريطانيه العليا حكمت لصالح براين لان القانون جاء بعد براين ما اتظاهر ولذلك يبقى الوضع على ما هو عليه
الحكومه استأنفت الحكم فى محكمه اعلى و بعد تدخل الحكومه حكمت المحكمه ان براين لازم يشيل الاف الافتات من امام البرلمان
فى الساعه 3 صباحا يوم 23/5/ 2006 جهز البوليس البريطانى عمليه اجلاء من بتوع حبيب العادلى وراحو لبراين علشان يشيلو الافتات والصور اللى الحكومه البريطانيه قالت عليها ان مخجله للحكومه امام العالم
وفعلا شال البوليس كل الافتات الا الافته الاصليه اللى براين بدأ اعتصامه بيها من 5 سنوات
اقرأ المزيد عن براين هنا:
http://www.parliament-square.org.uk/
Monday, August 28, 2006
هتوحشنا يا سولم
تم تعين المحافظ المحبوب عبد السلام المحجوب وزبرا للتنميه.على الرغم من حزنى الشديد ان اللواء المحجوب ترك الاسكندريه بعد جهوده الرائعه لتطوير اسكندريه الا أنى سعيد أيضا لان اللواء المحجوب رجل شريف ومش بتاع شيلنى واشيلك. المحجوب عمل فى اسكندريه حاجات جميله جدا وشجّع كل الاسكندرانيه ان هم يخدموا مدينتهم بنفسهم. ولذلك وجدنا رجال أعمال اسكندرانيه وغيرهم تبرعوا باشياء كثيره جدا لتطوير المدينه الجميله
أرجو ان المحافظ الجديد يكون على مستوى المسئوليه وما يرجعناش لايام الجوسقى الكريهه. لأن احنا اتخنقنا على الاخر. كما أرجو ان اللواء المحجوب يقوم ببطوير وزاره التنميه كما طوّر الاسكندريه. المحجوب سوف يواجه صعوبات كثيره فى قاهره المعز. لان هناك حرب كبيره ومجلس الوزراء مش زى مجلس المحافظه واعداء النجاح هناك على عينك يا تاجر وللى ما يشترى يتفرج. الوزراء هناك بيقلعوا الجزم لبعض وبيقولوا طظ فشر احمد عز وطلعت السادات. والكل هيبقى خايف من المحجوب لانه مش بتاع رشاوى ووسايط. ربنا يسترها ويوفق كل شريف وينتقم من كل واحد ما عندوش ضمير من بتوع قطار القليوبيه والبحيره وعباره السلام وقصر ثقافه بنى سويف ولحد أخر اللسته اللى انتو حافظينها
Tuesday, July 11, 2006
ديمقراطيه عماد... ونبيل الي ضاع
بعد 3 شهور من وصولى لنيويورك قررت ان اكمل دراستى هنا حيث انى لم احصل على اى شهادة من مصر الحبيبه سوى الثانويه العامه وسنتين فى كليه السياحه والفنادق. وفعلا اتقبلت فى جامعه نيويورك
المهم كنا فى يوم فى محاضرة تسويق دولي وكان يجلس بجوارى زميل لبنانى اسمه عماد.وهو لا يزال صديقى حتى هده الحظه
عم عماد دخل فى نقاش وجدال وحوار ومناظره مع الدكتور حول اهميه التسويق فى العالم الثالث
عماد مصمم..والدكتور كبرت فى دماغه وكل واحد عاوز يقنع التانى بوجهة نظره وانا قاعد اشد عماد من البنطلون واقوله اقعد الله يخرب بيتك هتترفد ولكن مافيش فائده
عماد راسه والف سيف ان التسويق فى العالم الثالث لازم يكون مبنى على اشياء ملموسه مثل اعلانات التليفزيون والدكتور مصمم ان ده تسويق رخيص وضحك على الدقون. وانا قاعد ومتأكدانى مش ها اشوف عماد تانى
السكشن كله متابعا لحوار بااهتمام بالغ وانا سرحت لورا لايام الدراسه الابتدائيه فى مصر المحروسه وفى حصه من حصص الجغرافيا المدرس قال ان طوكيو عاصمه الصين...ورد عليه تلميد جانبي اسمه نبيل وقال للمدرس بكل برائه لا يا استاد طوكيو عاصمه اليابان. وقبل عم نبيل ما ينطق حرف النون فى كلمه اليابان كان المدرس منقض على نبيل وهات يا ضرب ويقول انت عاوز تعلمنى يا ابن الكلب ومن يومها انقطع نبيل عن الدراسه ولا حاول اي واحد فينا يصحح اى غلطه للمدرس حتى لو كانت اسماؤنا
ومن هدا اليوم الفصل كله اتعلم يقول اللى تشوفه حرضرتك و كلامك اوامر وكل كلمات الخضوع
رجعت تانى لعماد والدكتور وا خيرا عماد اقتنع بوجهه نظر الدكتور
وبعد المحاضره عماد قال لى ان حريه الراى والتعبير حق يكفله الدستور اتارى عم عماد مولود فى نيويورك وعمره ما درس جغرافيا فى مصر
Wednesday, July 5, 2006
انا من مواليد قانون الطوارئ
انا من مواليد قانون الطوارئ. ماعرفش قانون غيره علشان يوحشنى و اقول فين ايامه. وفى جيل كامل زى كده اسمه جيل المتلخبطين
انا نشات فى بيت ناصري %100
صور عبد الناصر فى كل الغرف و اغانى عبدالحليم الوطنيه شغاله علطول. فابالتالى نشات احب عبدالناصرمن غير اي اسئله
لما كبرت ورحت المدرسه وقرات عن اكتوبر والسادات, حبيت السادات كمان ومين ما يقدرش يحب الراجل اللى رجع الارض وعبداحلبم غناله عاش الى قال للرجال عدوالقنال! و فضلت احبهم الاتنين لحد ما قرات خريف الغضب لمحمد حسنين هيكل وخريف الغضب جاب بعده اغتيال رئيس ثم البحث عن الزات وغيره وغيره لحد مقالات انيس منصور. وطبعا مابين كل الكتب والمقالات كان فى قنوات فضائيه من ضمنها الجزيره اللى ضيوفها دايما يتخانقوا مع بعض. كل ده واللخبطه عمالها تزيد
والجيل بتاعى لحد النهارده بيحاول يعرف الحقيقه. وعلى راءى الشحروره صباح" محتاره اشيل مين ولا اشيل مين جوه "عيونى
