الامين العام للجنه السياسات بالحزب الوطنى

سألنى صديق جاهـــل عن معنى ومخزى ( الامين العام للجنه السياسات بالحزب الوطنى). وكنت انا فى غايــه السعــاده للاجابـــه عــلى هذا السؤال العويص والمعضل

فلجنه السياسات ما هى الا مجموعه من السياسات المتكامله للوصول والعبــور بسفينه الوطـــن الـى بـر الامــان والاستقــرار الاستــراتيــجى المتفاعــل مع المشروع القومــى لتطوير البنيه التحتيه والفوقيه لجامع سيدى المرسى ابو العباس وسيدى بشــر وسيدى جابــر ومركز شباب الانفوشى

.. ومن امثله هذه السياســات القاتله على سبيل المثال وليس الحصر

السياسه الداخليه لتطوير السياسه العامه للجنه السياسات بالحزب الوطنى
السياسه الخارجيه لتطوير السياسه الداخليه لتطوير السياسه العامه للجنه السياسات بالحزب الوطنى
السياسه القائمه
السياسه القاعده
السياسه النائمه
السياسه النائمه على بطنها (لاحظ الفرق بين دى والسياسه اللى فوقها علطول
السياسه النائمه على جنبها اليمين والشمال ( لاحظ الفرق ايضا بين السياسه دى والسياسه اللى فوقها
السياسه الصاحيه
السياسه المعتدله
السياسه الملتويه
السياسه الواضحه
السياسه الغامقه
السياسه المسموعه
السياسه الملموسه
السياسه المرئيه
السياسه المخفيه
السياسه اللى مستخبيه (لاحظ الفرق يبنها وبين السياسه المخفيه
سياسه الموت علينا حق
سياسه غطينى وصوتى
سياسه صوتى ياللى ما انتش غرمانه (لاحظ الفرق بين الصويت اللى فوق والصويت ده
سياسه رقصنى يا جدع على واحده ونص

سياسه يا ام المتطاهر رشى الملح سبع مرات
سياسه ادلع يا رشيـــــدى
سياسه سد الحنــــك
سياسه سد اســوان ( لاحظ الفرق بين السد ده والسد اللى فوق
سياسه السد العالى
سياسه الكعب العالى ( لاحظ الفرق بين العالى اللى فوق والعالى اللى تحت
سياسه هز الوسط
سياسه وسط البلد ( لاحظ الفرق بين الوسطين
واخيرا سياسه

.........
ولقد اتبعت فى هذا التحليل السيــاسى سياسه البساطه والشفافيه والمصداقيـــه الخلابــــه لحب الله والوطــــن

مع تحيات الرأفتـــــانى السيـــــاســى

Read More

الحـــــــــرب بين الرجـــــل والمـــــــــــرأه

تنوعت اشكال الحروب بين الرجل والمرأه منذ قديم الازل
فقد تفوق الرجل على المرأه من ناحيه الجسد والعضلات ولو أنّى أشك فى ذلك لأن معظم نزلاء قسم الكسور فى القصر العينى من الرجال
ولقد تطور هذا العداء ..وبعد ان كانت الحرب بالايد والرجل والساطور والمطواه والجنزير, اصبحت الحرب اعلاميه من المقام الاول
وفى الحرب الاعلاميه تفوقت النساء تفوق بالغ ومنقطع النظير

بروبوجندا الرجال هى ان معظم النساء ما بيفكروش..وما بيستخدموش عقولهن...ويقال ان لو واحده منهم استخدمت عقلها وفكرت قبل ما تتكلم بتصاب بحاله اعياء وهرش وحساسيه شديده وبتروح للدكتور لمده اسبوع على الاقل وايضا انا اشك فى ذلك لأن معظم نزلاء السرايا الصفراء برده من الرجال

المهم , بتطور العصور والقوانين والمحاكم والخلع وخلافه.. اصبحت الحرب بين الجنسين حرب منشورات وتسييح وتهييس على منوال الكلام ليكى يا جاره وخدوهم بالصوت لا يغلبوكم وايضا تفوقت النساء فى حرب المنشورات

فمثلا فى الناحيه الرأسماليه حيث الشك فى قدره الرجل الماديه وان الجوازه طلعت فشنك ومقلب , نجد هذه المنشورات القيّمه التى تعطى عبره وموعظه لبنات الجيل الجديد اللى بيدورو على شباب النيولوك

يا واخده القرد على ماله...يغور المال ويبقى القرد على حاله
ايش ياخد الريح من البلاط
يا جاريه اطبخى ....يا سيدى كلّف
جبتك يا عبد المعين تعينى ....لقيتك يا عبد المعين عاوز تتعان


وفى منشور بديع عن عدم الثقه وان الرجال كلهم واساخ ومعندهمش اصل ببصله

يا مآمنه للرجال ....يا مآمنه للميه فى الغربال
قصقصى ريش طيرك...قبل ما يلوف على غيرك
من بره هالله هالله...ومن جوه يعلم الله
ديل الكلب عمره مايتعدل ...ولو علقوا فيه قالب
فى حزنهم مدعيه...وفى فرحهم منسيه

وفى منشور آخر عن الملل العاطفى وان الرجال دول ايدك منهم والارض وان الشنبات دى منظر فقط وان نص المرتب ضايع على الفياجرا والافيـــــــــــــــــون

لولا جارتى ...كانت اتفقعت مرارتى
يا قلبى يا ابو اكتاكت ... يا ماانت شايل وساكت
بنا لى فى الخطوبه مسطبه....وفى الجواز بلحه معطبه
لبست لك الاحمر والشفتشى... وانت زى البنات بتختشى

وعند سؤال الرجال عن هذا الضعف المهين ولماذا السكوت على هذا الوضع...نجد هذه المنشورات العبيطه

ما باليد ...حيله
علشان الورد .... ينسقى العوليئ
اللى يخاف من العفريت ..يطلع له
العشره ما بتهونش ...غير على ابن الحرام
اللى ليه ظهر ... ما ينضربش على بطنه
اللى مش عايز وجهه النهارده.... بكره تحتاج لقفاه

وعليه العوض ومنه العوض...وحسبـــــــــى الله فى النسوان جميعا

وعلى راى الراجل العبيط بتــاع مدونــــه مصر الجديده وشفافيـــه الحزب الوطنى: فهل بعد هذه الادله, ادله اخرى..عزيزى القارئ

Read More

تعددت الاسباب....والسجن قادم

ُجد والدتى كان راجل ثورجى..فى يوم خلع صوره الملك فاروق من على حيطه الدكان بتاعه وقعد يدوس عليها بالجزمه علشان عساكر قصر المنتزه اشتروا منه دقيق ومادفعوش. المهم انه اتقبض عليه واتحبس 21 يوم. جدى كان عارف التهمه بتاعته وهى العيب فى الذات الملكيه
اليومين دول بأه انت ما تعرفش تهمتك ايه..ولو انت دكر بجد..تعرف انت محبوس ليه ولا انقبض عليك ازاى

ممكن تكون ماشى على الكورنيش فى حالك ويطب عليك العسكر ويقبضوا عليك بتهمه التحرى

طاب يا جماعه تحرى ازاى وانا معايا بطاقه

صورتك مش واضحه فى البطاقه

ماهى الصوره واضحه زى الشمس اهى

صورتك وحشه ..اركب البوكس

وفى حاله اخرى. تكون واخد المدام يوم الجمعه تصلى..وانت طالع من الصلاه..يتم القبض عليك
ليه بس هو انا عملت ايه

فعل فاضح فى الطريق العام

فاضح ازاى بس. دا انا لسه طالع من الصلاه

هو كده..الصلاه فعل فاضح..اركب البوكس

وبمناسبه الصلاه..مره امن الدوله ارسل لوادى وقالوا له ابنك فى امريكا من فتره طويله..هو هيرجع امتى؟
الحاج قال لهم..ده مش راجع..دا هو عايش هناك وبيجى اجازات فقط
فالضابط سأل الحاج: ابنك بيصلى فى اى جامع فى نيويورك؟
الحاج صايع قديم..قال للضابط.. يصلى ايه بس يا فندم..دا الرافتانى خمورجى وحشاش وبتاع نسوان ولحد النهارده والدته غضبانه عليه
ابتسم الضابط وقاله شكرا يا حاج,,, واسفين ع الازعاج

وتعجز اى دوله فى العالم ان تنافس مصرالتى فى خاطرى فى خلق اسباب القبض والتلفيق..مفيش دوله زينا يا عم الحاج..احنا ملوك التلفيق والتناحه

خطر على الامن العام...اركب البوكس

خلق حاله من البلبله والفوضى...اركب البوكس

العيب فى الذات الحبيب عدليه والصفوت شريفيه والمباركيه...اركب البوكس

التجول فى منطقه ممنوع فيها حذر التجول....اركب البوكس

بتسأل كثير عن الدستور والانتخابات والكلام الفاضى ده...اركب البوكس

شكلك وحش...اركب البوكس

صاحبك اللى انت ماشى معاه شكله وحش...اركب البوكس

عدم الانضمام للحزب الوطنى وانشاء حزب جديد والتزوير فى اوراق الحزب الجديد...اركب البوكس

عدم تزويرك لشهاده الجيش وشهاده الجامعه...ما تركبش البوكس..روح غنى فى احتفالات حرب اكتوبر

Read More

الرأفتانى فى الزواج

هى: تصحو من النوم مفزوعه فى نصف الليل..تصرخ ..تصرخ..تصرخ..تصرخ

هو: مفزوع من صراخها..خير يا رب..خير يارب.. اللهم اجعله خير..فى ايه

هى: ماسكه مرآه فى ايديها... بٌص وفى وشى انت اتعميت ولا ايه.. بٌص كويس يا اعمى البصر

هو:يدعك عنيه الاثنين.. ويبص فى وجها..لامش شايف حاجه ..خير ..خير..لدعتك عقربه ولا حد رشك بميه نار ولا ركبك عفريت

هى: لا يا طور..فى فُسفسه فى خدى اليمين..شايفها؟

هو: لامش شايف الفسفسه يا حبيبتى..جايز تكون حسنه او وحمه اويمكن تكون لدغه برغوت او قمله

هى : وحمه هاتطلع لى فى نص الليل يا عديم الاحساس..دى اكيد فٌسفسه قاتله

هو: يا حبيبتى حتى لو فسفسه لا قدر الله.. نامى والصباح رباح

هى : انام ازاى يا ابو قلب حجر والفسفسه دى على خدى.. لازم اروح للدكتور

هو: دكتور ايه دلوقت دا احنا وش الفجر

هى: طبعا وانت هيهمك جمالى فى ايه..الاسبوع اللى فات طلعت لى حبايه فى ضوفر رجلى الصغيّر ودلوقتى فسفسه فى خدى اليمين ويا عالم بكره هيكون ايه..وانت ولا على بالك

هو: يفتح الباب ويرمى نفسه من بلكونه شقته فى الدور ال50

هى: طلعت البلكونه تصرخ..تصرخ.. وتقول ... مين اللى هيسوق العربيه للدكتور دلوقت يا عديم المسؤليه

هو: مرمى على الارض فى وسط بركه من الدماء.. يطلع مسدس من جيب البجامه ويضرب نفسه 10 طلقات

هى: تصرخ من البلكونه كده عورت نفسك.. خلاص مش مهم الدكتور دلوقت

هو: يطلع قنبله صغيره من الجيب التانى بتاع البجامه ويبلعها

Read More

الرافتانى فى الاغانى الوطنيه

لحد ما الواد

عمر

الرخم صاحبى يساعدنى تجميع كل الاغانى الفاشله. ها نناقش شويه اغانى وطنيه ... حاكم الاغانى الوطنيه دى هى سبب الخراب للى احنا فيه .. ايام الحرب نغنى.. ايام السلم نغنى .. لما ننضرب على قفانا.. نلبس اسود ونغنى.. لما نكسب ماتش كوره نغنى.. لما ا صبحنا احسن ناس نغنى على بعض

خد عندك دى من اغنيه اخترناه
لا هيدينى ولا يغدينى ولا فى مصلحه بينو وبيينى
غير لولادنا وحب بلادنا وعشان كده احنا اختارناه
اخترناه.. اخترناه
وفى لقائاته ببلدياته بينسى معاهم رسمياته
واما يحاسب حد يعاتب. ما سمعناش عن حد اذاه
وباقوله ورزفى على الله

ايووووووه ع الكذب يا جدعان.. ما سمعتوش عن حد اذاه خالص. ولا حتى واحد اتأذى... ياولاد الكذّابه.. احييييييييييييييييييييييييييييييييييييه

ودى من اغنيه يا جريد النخل العالى ميل وارمى السلام..اسمع الكلام

الراحه فيكى واحه.. مريحه وساحه خضرا
قادره على السباحه .. لو حتى الموجه غادره

راحه ايه وساحه ايه وخضرا ايه.. الناس دى باين عليهم ساكنين فى الملاهى... ما
سمعوش عن امن الدوله
والله لو كنت حتى مولود فى بير مسعود.. ما ها تعرف تعوم ولا حتى ترفص برجليك.. انت غريق غريق

الحل الوحيد معاهم انك تحصل لك معجزه غراميه زى عبد الحليم وتصبح تتنفس تحت الماء... بس برده هتغرق

Read More

الرأفتانى فى الغرام

اخوكم فى ملاعب العواطف والغرام عامل زى الضيف احمد فى حلبات الملاكمه والمصارعه وزى هشام يكن فى ملاعب الكوره ومحمد رضا فى سباق 100 متر حواجز.. وعندما تأتى الى الحديث مع الصنف الناعم.. اخوكم بيحدف دبش عند الكلام فشر اطفال الانتفاضه او اولاد الحاره لما كانوا بيجروا وراء كلب جربان
ففى احدى الصولات الغراميه..كانت فى بنت ايطاليه جميله ..صاروخ فشر صاروخ شهاب 2 الايرانى.. واخوكم نازل نظرات لمده شهر كافلاطون.. البنت اتخنقت منى وقالت ابوالهول ده هينطق امتى وجاءت فى يوم وقالت لى تحب تتعشى معاياه فقلت طبعا طبعا.. وفى اليوم الموعود اخوكم لبس على سنجه عشره وكبييت على نفسى جردل كولونيا واخدت زجاجه تانيه فى جيبى.. بأقيت ماشى فى الشارع كأنى محل عطور متنقل..وروحنا المطعم .. وكان مطعم يونانى هنا فى نيويورك.. المزيكا حلوه والنور هادئ.. وقمر قاعد على الناحيه التانيه من الترابيزه والعبد لله قاعد ما تقولش قالب طوب.. القمر يلاغى وويتكلم واخوكم قاعد فى نصف هدومه زى بنت بنوت.. ومنذ هذا اليوم اللعين وانا بطّلت اروح مطاعم هاديه تانى.. انا شكيت ان الجو الهادى ده هواللى سّبب سد الحنك

وفى جوله غراميه تانيه ايام ما كنت فى مصر تقريبا فى اولى ثانوى..عملت فيها روميوبتاع العصر الجديد اللى مابيكتبش جوابات وروحت عامل شريط عاطفى.. ع الاقل فى نظرى انا كان عاطفى.. وارسلت الشريط للحبيب ..وعرفت بعدها بكذا يوم من واحد صاحبى ان( هناء) راحت المستشفى من القرف
فى صولات تانيه مسخره.. بس خلى الطابق مستور

Read More

الوالى والوزير

مره الوالى قال لوزيرُه

اخبار شعبى وبلدى ايه

رد وزيرٌه وقال له ياوالى

نام وارتاح قلقان من ايه

شعبك داير ويّا الساقيه

وانا بإديّه مغمى عنيه

قال له انا خايف شعبى يفكّر

ياخد الكرسى اللى بيحمينا

وابنى حبيبى خليفتى فى ملكى

هيتوه وسط الناس بعدينا

ها ها ها ها
قصدك يعنى مملوك عادى

يجى القصر ويحكم فينا

مملوك ايه اللى هيوصلك

وانت عساكرك تحت عنينا


كلمه حُر وكلمه حُره

مليا الشارع

شعبى بيحلم بالحريه

وزمنى شكله خلاص مش راجع

عسكر جيشى مش هتأثر

وشعبى هيرفض تانى يبايع

احنا الشعب بإيدنا نكسّر

ترس الساقيه اللى مغمينا

احنا شباب وبنات وشيوخ

اللى حاربنا علشان سينا

الماضى عدى بحلوه ومُره

وبكره بتاعنا وملك ايدينا



يالا تعالوا نشيلوا الوالى

ويّا وزيره

يالا تعالوا وبصوت عالى

نختار غيره

Read More

الاغانى للرأفتانى- جزء تانى

الاغانى للرأفتانى – جزء تانى

بعد كتابه الجزء الاول من الاغانى للرأفتانى. جاءت تعليقات الساده القرّاء والمدونون ساخره لازعه ومليئه باقتراحات الاغانى الغراميه اللى محتاجه تفسير فمثلا حفصه وضحت عامل الوقت واعطت مثال باغنيه لعدويه واحمد شوكير عمل نفس الشيء واعطى مثل بأغنيه لعبد المطب اما شهروزه فلفتت نظرى لعوامل اقتصاديه تانيه

نبدأ بعامل الوقت ودوره فى الحاله الغنائيه العاطفيه . فنجد عدويه يقول " الساعه الا ثلث ومعادى معاه 8 لا من السكه دى روحت ولا لاقى سكه ثانيه ...وكثير الناس كثير وانا عايز اركب واطير" عدويه ضرب هنا 100 عصفور بحجر واحد فقال ان "الساعه الاثلث وميعادى معاه 8" وهذا الاسلوب اشتهر به عدويه وهو انه يسيب خيال السامع يحوم فى بحر الخيال زى ابو فراس الحمدانى . عدويه مقلناش الساعه كام الا ثلث... اذكى السامعين هيقول ان الساعه 8 الا ثلث وعدويه عنده ثلث ساعه بحالها علشان بركب المترو اوياخد مشروع او لوكان صايع اوى هياخد تاكسى ويوصل لحبيبه فى ميعاده وهو الساعه 8. لكن عدويه كالسهل الممتنع قطع الطريق على خيال السامع وقال"كثير الناس كثير وانا عايز اركب واطير" يعنى ان الناس كثره والدنيا زحمه فمش نافع تاكس ولا مترو ولا ميكروباص ووسيله المواصلات الوحيده المتاحه لعدويه للوصول لحبيبه هى الطيران فقط. يا سلام ياابو محمد, نزيه والله طول عمرك

زى ماكلكم عارفين ان عدويه ظهر فى اواخر السبعينات واوائل الثمانينات فكانت وسائل المواصلات كثيره والدقيقه لها ثمن. اما العبقرى محمد عبد المطلب ظهر فى جيل اسود من السواد لا احترام للوقت ولا اى شئ فقال" السبت فات والحد فات وميعاد حبيبى يوم التلات" الحاج عبده مقلناش هو النهارده ايه .. وبرده ماجبش سيره يوم الاثنين اللى هو المفروض يكون قبل يوم الثلاثاء.. ناس داخت وغلبت علشان تجيب تفسير لكن هيهات. فى ناس تانيه من علوم الفلك قالوا ان يوم الاثنين ما كنش موجود لسه على ايام عبد المطلب وان الناس بدأو يستخدموا يوم الاثنين بعد عبد المطلب بعشر سنين وهذا التحليل اقرب الى غيره من الصواب والله اعلم

فى مطرب تانى بيقول" ياولاد بلدنا يوم الخميس هاكتب كتابى وابقى عريس... والدعوه عامه وهتبقى لمه" من سماع هذه الابيات تعرف ان المطرب ده كان عامل كمين لمصر. زى ماتقول كده كان بيتلكك. ازاى؟ اقولك. المطرب ماقلش الفرح يوم الخميس من شهر كام سنه كام؟ عايزك تبقى مستعد للفرح فى اي وقت وده اسمه فى الشعر العاطفى اسلوب الكوارث والاسلوب ده بتستخدمه الحكومه المصريه كثير. فى العبارات والقطارات وحريق المسارح. عايزك تبقى واقف على طراطيف صوابعك مستنى الفرح. ويقال ان المطرب ده كان ناوى يروح لناس معينه يعاتبهم على عدم حضورهم كتب الكتاب وان مش هيقبل العذربتاع احنا معرفناش اى خميس. وفى تفسير تانى يستاهل توضيحه وهو ان المطرب ده كان بخيل وجشع ولذلك وجه الدعوه عامه لكل شعب مصر علشان كل واحد يجيب معاه هديه يوم كتب الكتاب

وبقارنه بسيطه للحب ايام زمان والحب اليومين دول هتجد العجب العجاب. ايام زمان كان فى رقه وكسوف فمثلا تجد الرقيقه شاديه تقول "مكسوفه مكسوفه منك مش قادره اقولك انى بأحبك" وتجد ام كلثوم تقول " بدى احكيلك ع للى فى قلبى....وعزه نفسى منعانى" الحب مدوّب الستين بس فى كسوف وعزه نفس . وتجد من غير خشى ولا حياء نانسى بتقول" معجبه مغرمه أنا بأه مش عأوزه الا هو.. حد يقول له أنى بحبه الحب ده كله" نانسى يا ساده مش عاوزه غير الشاب الحليوه ده ياهو يا بلاش يا هتعيط وكانها واحده رايحه الشواربى تشترى جوز شرابات

احنا جيل محظوظ اوى ربنا كرمنا بوسائل عديده للاتصالات الغراميه. مثلا واحد عايش فى نيويورك عاوز يلاغى حبيبته فى مصر. ممكن يبعث ايميل رساله ع الموبايل ولو معاه رصيد يرن رنه. يعنى كل الوسائل متاحه مفيش حجه . ايام زمان بأه كانوا بيستخدموا وسائل اتصالات غراميه مختلفه خالص. فمثلا نجد مطرب بيقول " ياوابور الساعه 12 ياللى مقبّل ع الصعيد..خد منى سلام وتحيه وروح لحبيبى فى يوم العيد" شوف الفرق بين جيلنا المرّفه وبين هذا العاشق الغلبان. كل اللى هو عاوز يعمله ان يبعث كارت معايده لحبيبه فى يوم العيد. فلم يجد هذا العاشق سوى قطار الساعه 12 وكان هذا القطار قطار محافظات مش سريع لان المطرب ما لحقش قطار الجرايد بتاع الساعه 5 الصبح علشان يبعث معاه الرساله. ويحكى ان بعد القطار ما وصل لبيت المحبوبه لقاها اتجوزت وخلفت ولدين اسمهم التوتو بكر والأنّا ابو زيد

وبتطور وسائل الاتصالات الغراميه نجد الرقيقه نجاه بتقول" وبعتنا مع الطير المسافرجواب وعتاب وتراب من ارض اجدادى وزهره م الوادى" ياسلام يا نوجه. استطاع هذا العصفور العملاق ان يحمل الرساله والوورد والعتاب وكمان تراب من ارض الاجداد. كنا نحن الشعب ظالمين الحكومه ومفكرين ان الحكومه سرقت ارض الاجداد لكن الحق ظهر واتضح ان عصفور نجاه هو اللى اخد ارض الاجداد علشان يوصلها للحبيب المهاجر

واحب ان اختم كلامى باغنيه يأس جميع الناس من تفسيرها لان خيالها واسع اوى ولقد عجز الرأفتانى نفسه عن تفسير هذه الاغنيه . يقول مطرب الاسكان الشعبى والعوامل الجغرافيه الفنان محمد رشدى"كعب الغزال يا متحنى بدم الغزال..ما تبطل تمشى بحنيه لايقوم زلزال" فى البوست اللى فات رشدى عمله قلبه شارع وعماره علشان ازمه الاسكان. المره دى هو خايف من قيام الزلازل
والحق اقول انا لسه امام عده اسئله محيره لتفسير هذه الدرّه الرائعه
يا ترى رشدى حب وعشق هذا الغزال؟ ولا حب طعم اللحمه بتاعته؟
ولو حب وعشق الغزال ليه قتله وصمم انه يوسخ كعب الغزال بدمه؟
ناس بتقول رشدى ما كنش ليه فى اللحوم كان بياكل خضار بس وانه قتل الغزال علشان ياخد شويه دم يعمل بيهم عمل وحجاب لمحمد قنديل ومحرم فؤاد علشان كانوا واخدين منه كل الافراح وكان عاوز يوقف حالهم

يا ترى ما نوع هذا الغزال المخيف اللى لومشى ع الارض بهدوء هيقوم زلزال؟
على علمى ان الغزال سريع وخفيف الحركه
اسئله محيّره ولازم نلاقى ليها اجابه فى يوم لو مش الرأفتانى الكبير هيبقى الرأفتانى اللى بعده

انا رايح دلوقت اشوف شويه فيديو كليب من بتوع مروه واليسا والناس الحلوه دول يمكن الاقى حاجه تانيه تتكتب

Read More

الاغانى للرأفتانى

العوامل الجغرافيه لها دور كبير فى العشق والحب وخلافه فمثلا الحاج محمد عبد المطلب قال (ساكن فى حى السيده وحبيبى ساكن فى الحسين وعشان انول كل الرضا يوماتى اروحله مرتين) وعلى ايام الحاج محمد الظاهر ماكنش فى موصلات لان المسافه من السيده للحسين مش محتاجه العويل واللطم دا كله. امال لو كان هوه ساكن فى الهرم وحبيبه فى مدينه نصر مثلا كان عمل ايه

والعبقرى احمد عدويه خطى على نفس الخطى الجغرافيه حيث قال( سعيده يا حلوه سعيده..موصلاتك بعيده .. أؤمرى وانا اجيلك ماشى ..لما لمصر الجديده) وذكاء عدويه انه مقلناش انه هيمشى لمصر الجديده منين بالضبط. فترك تحديد نقطه الانطلاقه لخيال السامع ودى نقطه ذكيه جدا من عدويه علشان يخلى كل واحد يحط نقطه الانطلاقه الخاصه بيه ولو انى اشك ان اى احد من عشاق عدويه يعرف اى حد ساكن فى مصر الجديده

ومن الناحيه الاقتصاديه مثلا نجد المطريه مروه اللى واخده الدنيا بصدرها تقول فى احد اغانيها ( فيها ايه لو اكلم صاحبك .. ليه تخلى الغيره تصاحبك) وهو دليل اقتصادى قيّم للتوفير. فالست مروه عايزه تخدم حبيبها وصاحبه فى نفس الوقت وهى بذلك تكون وفرّت طاقه فتاه اخرى للقيام بنفس المهمه الاقتصاديه المقدسه.
وقد حذى على حذو مروه مطربات كثيرات ذوات عقليه افتصاديه فزّه فشر اتخنها عالم فى الاقتصاد والتوفير. فمنهن نجلا ونانسى وهيفاء واليسا ورغم اختلاف الشكل وحجم الشفايف والاعضاء والقطع البلاستيك المزروعه الا انهم اجتمعوا على الاقتصاد والتوفير فى حجم الملابس المستخدمه. فكلهن اجمعوا ووافقوا انهن يعروّا اجسادهن فى سبيل توفير الخامات الضروريه لصناعه الملابس للمساكين والمحتاجين

وفى نظريه اقتصاديه اخرى للخبير محمد رشدى حيث حمل على كتفيه المشكله السكانيه وخطى خطوات جريئه لم يخطوها خبير التخطيط كمال الجنزورى ففى احدى اغانى رشدى الاقتصاديه قال ( قلبى يا قلبى يابو الحياره.. والله لاعملك شارع وحاره .. واحط نخله م الورد الاخضر وحبه حبه تصبح عماره) يا سلام يا رشدى. مش هيبنى اى عماره جوه قلبه الواسع اوى. دى الشارع اللى هتبقى فيه العماره , هيكون فيه شجر وورد وخضره و ممكن كمان يجيب تصريح من الحى ويعمل نافوره فشر نافوره قصر المنتزه

والى لقاء اخر من الاغانى للرأفتانى مع الاعتذار للأصفهانى الكبير

Read More

بصراحه كسلان اكتب

مفيش حاجه ينكتب عنها. الشغل زحمه ومذاكره الماجستير أرخم من كمال الشاذلى واحمد فتحى سرور.بمناسبه احمد فتحى سرور. بكره ان شاء الله نوفمبر 7 الانتخابات التشريعيه هنا فى امريكا. كونجرس وخلافه وعقبال عندكم لما صوتكم يبقى له قيمه اخوكم رايح ينتخب بكره واتذكر اول مره انتخبت فيها وكانت انتخابات العمده هنا فى نيويورك ولما الناس المشرفين على لجنه الانتخابات عرفوا انها اول مره لى قعدوا يصفقوا ويهنونى بممارسه اول حق ديمقراطى يكفله لى الدستور الامريكى وسلم لى ع الماده 76 ومعدلات الماده 76

Read More