لى ابن عم فى سنى..وكان دايما معى فى نفس الفصل ونفس المدرسه لحد اول ثانوى عام كده لما انا سافرت
خالد ابن عمى كان مهمل شويه.. يعنى مفيش كتب مفيش كراسه مفيش قلم.. عادى يعنى.. كان بيجى الفصل اثبات حاله وكأنه بيعمل جميل فى وزاره التربيه والتعليم
وكان لنا مدرس رسم اسمه الاستاذ حافظ.. وكان الاستاذ حافظ مفكر نفسه بيكاسوا .. وكان بيصدعنا بالفن والفنانين ولوحات .. ومتاحف وغيرها من الحاجات اللى بتخنق.. وكان نص الفصل يا اما بيذاكر ماده تانيه مهمه.. يا اما بيشربوا سجاير ورا
المهم ان فى احدى الحصص.. الاستاذ حافظ زعل ان خالد ابن عمى ماجبش كراسه الرسم ولا الالوان بتاعته.. والاستاذ حافظ وقف خالد فى وسط الفصل وقاله
انت ليه مش زى ابن عمك الرأفتانى ملتزم وبتجيب اداوات الرسم معاك
وأنا قاعد جنب خالد والاستاذ حافظ قاعد يهزأه وخالد ابن عمى اتخنق منه ع الاخر
والاستاذ حافظ قالى يا رأفتانى.. انا احترت مع ابن عمك ومش عارف اعمل ايه معاه.. ياريت تخليه يلتزم زيك
انا كان لازم انقذ الموقف لان خالد كان على شفا انه يطلع المطواه ويخبط الاستاذ حافظ سن ويريح المدرسه والمنطقه التعليميه من قرفه
اقوم انا اعمل ايه؟
اقوم اقلع الجزمه وافقع خالد ابن عمى جزمتين على دماغه
واقوله : كده يا ابن الكلب... كده
جايب لنا الكلام من اللى يسوه واللى ما يسواش
خالد ابن عمى نام ع الارض من الضحك
وانا شغال ضرب بالاقلام والجزمه وهيصه ما تقولش عركه فى سوق زنانيرى
الاستاذ حافظ قعد يسلك فينا ويقولى خلاص ... الكلام ده فى البيت مش هنا... خلاص كده كفايه
وانا اقول .. لا يا استاذ حافظ .. لا انت مش عارف الولد ده بقله التزامه عامل ايه فى والده؟ دا عمى خلاص غلب معاه وقرب يموت
وصممت ان اخد خالد واروحه البيت علشان اكمل العلقه هناك ويكون ابوه حاضر المعركه
ووافق الاستاذ حافظ.. ما هو عاوز يخلص مننا... وطلعت انا وخالد طيران على قهوه عم حسنى نستنى مدرسه البنات لما تطلع
75 رأى:
ههههههههههههههههه
ايه العبقرية دى؟
لا.. وعاملى فيها التلميذ المؤدب الغلبان فى أول البوست!! ده أنت طلعت انيل منه
:) :)
وايه المدرسة اللى كانوا بيشربوا فيها سجاير فى الفصل دى؟! دى مدرسة ولا غرزة
هههههههه
مش عارفة ليه افتكرت المثل بتاع انا واخويا على ابن عمى وأنا وابن عمى على الأستاذ حافظ
:)
manal
الله يخرب بيت دماغك
انا قاعد في المكتبة عمال اضحك زي العبيط
بوظطوا سمعت مصر في الخارج الله يخرب بيوتكم
هههههههههههههههههههههههههه
الله يخرب عقلك يا رافت
دة انا صحيت ابويا من كتر الضحك
طول عمرك مثال للالتزام ياريس
بس بذمتك الادوات اللي كنت بتجيبها دي بتاعتك ولا شاحتها من الواد اللي جنبك
هيييييييييه ايام فكرتني بايام المدرسة
وبعدين صحيح ايه حكاية السجاير دي
مسكين يا استاذ حافظ عشان بس مخدوع فيك ومش عارف اللي فيها
ههههههههههههه
موتني من الضحك
والي بالشغل معايا مش عارفين مالي افتكروني اتجننت
ههههههههه
عسل يا رأفت
منـــال
انتى كنت مفكرين فى مدرسه لغات ولا ايه..ولا تكونيش فاكرانى بأقول بابى ومامى..
با بنتى ده الناظر كفر..
على ما اسمع دلوقت ان الاستاذ حافط اتجنن ربنا يحفظنا
عــــــمر
ازيك يا صديق..اخبار المذاكره ايه؟؟
انا ربطت للك مع الناس هنا والجميع فى انتظار زيارتكم المباركه لنيويرك
باقولك
انت جبت معاك كارت تليفون مصر ولا ايه ظروفك؟؟؟ لو ماجبتش قولى علشان فى واحد جاى قريب وانا ممكن اخليها يجيب لى واحد
رشـــــــا
ازيك يا قمـــر
يارب تعيشى كده وتضحكى علطول
انا روحت عندك ثلاث مرات بس لسه الشعر اللى هناك عويص على شويه..
ع العموم فى انتظار حاجه جديده
سمرا
الادوات دى كنت باشحتها من فصل تانى يكون لسه مخلصين حصه الرسم..
الاستاذ حافظ ربنا يشفيه كان واخد فى قلم ابن كلب..
أيووة يا رأفت فكرتني بالذي مضى يا جدع حاجة كدة بتاعة 20 - 22 سنة و بعدين أية الناس الفرافير اللي بتعلق دي , أة طبعا سجاير و مجلات ثقافية ز كل حاجة ( ماكنش لسة فية بانجو على أيامنا ) .
دة الواقعة اللي حكاها رأفت دي حاجة كدة خفافي , تفاريحي يعني .
للعلم محسوبكم أورمانجي قديم .
والنبى يا كــوبرا يا اخويا
كنت تمشى فى الحوش تلاقى سرنجات مرميه وعلب توسيفان فاضيه
بس الزمن اتغير...الخير ضاع يا مان
العيال دى بتاكل هوهوز وبتفطر مربه الصبح
حاجه تكسف
أنا فاكر لما كنت في ثانويةعامة و عملت سهام لما تخبط في حاجة تولع , والعيال ولاد ال@# أستعملوها عشان يضربوا أستاذ الباز مدرس الكيميا بيها و يوميها كلنا حتة علقة من المدير بالخرزانة التلاتة متر اللي كان مايمشيش من غيرها و أستدعا ولي أمر و فصل أسبوع مع علقة تانية و أول يوم رجوعي المدرسة بعد الفصل كان يوم أحداث الأمن المركزي .
فكرتني بالتوسيفان و السرنجات نسيت دي كمان , ولما كنا بنط السور عشان نضرب فول على عربية عم سيد و لا كشري و لا حلبسة .
أشطة يا مان ذكريات الطفولة المشردة.
طبعا يامان..هو كان فى احلى من الايام دى..بمناسبه الرفد..انا لى ابن عمى اكبر منى فى السن وكان اسمه حســن وكنت دايما اخده معايا فى المواقف دى اللى تحتاج ولى امــر..لان لو الحاج كان عرف كان زمانى فى المعتقل..
وبمناسبه الصواريخ وخلافه
والله يا سممسم فى يوم كده والطابور الصباحى شغال..اقوم الاقى وكيل المدرسه الاستاذ عبد الله..وكان شبه الشايب بتاع الكوتشينه
المهم لاقيت الاستاذ عبد الله بيجرى وواد اسمه حمامه فليفل بيجرى وراه بمسدس..هههههههه
على النعمه مسدس يا مان..
الدنيا اتقلبت
المشكلة يا رأفت أني كنت أكبر و احد و ماليش حد أستعين بية في المواقف اللي دي , بس بيني و بينك الحاج طلع متفاهم جدا مع أني كنت متوقع النفي لمالطا .
ههههههههههههههههه
الحمد لله ان الحاج عندك كان متفاهم..
الحاج عندى كان متفاهم برضه بس الحاجه ام الرأفتانى كانت دائمه التسخين فيه من ناحيتى بخصوص التعليم والدين..لانها كانت معتقده انى علشان بآجى هنا وانا صغير انى هاصيع ..
لكن الحمد لله...الناس دى بركه وهم السبب فى الخير اللى احنا فيه
أية دة دأنت الحج و الحاجة نسخة بالكربون من عندي الحاج كان متفهم في كل حاجة و بالذات لما أبتديت أعرف بنات و الحاجة هي اللي كانت حقنة و دائمة الذر و كل حاجة كنت باعملها كانت بتقول عليها انعا هتبقى سبب فسداني .
بس زي ماقلت الناس دي هي البركة , اللة يرحم الحاج بقى و يشفي الحاجة .
اللهم ارحمه واغفر له يا رب
ويشفى لك الحاجه ويخفف عنه
اللهم آمــين
-----------------------
الواد عمر جاى لى يوم 27 الشهر ده..
ان شاء الله..
Have fun يا باشا , أنا زي ماقلتلك أحتمال أجي من 11 اللى 15 أبريل , عندي مؤتمر , بس مش عارف هيسيبوني أطلع و لا لأ لأني هاكون لسة راجع من مؤتمر في واشنطن من 17الى 25 مارس ربنا يسهل .
ألف شكر على العاء يا مان ربنا يتقبل منك .
امان يا مان
زى ما قلت لك ..ان شاء الله مافيش مشاكل من جيرسى سيتى لنيويورك 20 دقيقه يامان
وياريت تيجى..هتشوف اشكال فشر الازهر ودير الملاك والسيده زينب
ههههههههه
أنا كنت داخلة أقرأ الايميل بتاعى وخارجة تانى.. بس قلت اعدى عليكوا الأول
ايه يا بنى ده؟!! أنت متأكد انك كنت فى مدرسة؟!!.... مسدس؟!! ده كده أحداث يا رأفت
:)
والله انا كنت هموت على نفسى من الضحك
منكم لله
:) :)
manal
وعلى النعمه يا منال الواد فليفل
كان بيجرى ورا الاستاذ عبدالله بمسدس..والطابور الصباحى شغال
وبعد هذه الموقعه الحاج قرر قرار ان الرأفتانى يتعلم فى امريكا..ومن يومها
حمش من يومك يا رورو
انا كنت شاكة انك دخلت مدارس قبل كده بس اهو ممكن نسال ابن عمك
بس حلوة التمثيلية اللى عملتوها دية
ايه اخبارك فى الرسم باه ؟؟؟؟؟ سيريالى و لا ايه
مدرسة البنااااااات ماشى يا عم ربنا يسهلك
ما عليــــــنا
ايه رورو دى؟؟؟؟؟ انا كنت مدرسه عسكريه ....لا تكونى مفكرانى زيك خنافس باكل هوووز وافطر مربه الصبح..
ههههههه
وعلاقتى بالرسم كعلاقه ام على بتاعه الجرايد بالكمياء النوويه..
لا افقه الرسم ولا احبه
وافتكر اول مره روحت فيها متحف اللوفر فى باريس ..الناس كانوا مقطعين بعض علشان بتفرجوا ع الموناليزا..واخوكى راح
3 دقايق..وضربت كف على كف ع الناس العبيطه
مدرسة عسكرية؟؟؟؟؟
شكلك مدخلتش مدارس اصلا و واخد محو امية اخرك
بقيت تعرف الهوهوز و المربى كمان الله يرحم ايام زمان و لا بلاش
طبعا محو الامية امثالك ميقدروش الفن الرفيع
بس استنى روحت متحف ايه يا رورو هتهجس علينا طب امريكا و عدينا بمزاجنا بس باريس طلعت منك
out
ما عليـــــــنا
اخص الله يلعنك ويلعن لسانك اللى عاوز قطعه
على النعمه لاصور البسبور واوريكى ختم دخول فرنسا..
حاكم احنا الامريكان ملناش فيزا زى دول العالم الثالث
هههههههههههههههه
محو اميه يا عره
على النعمه اثنين بكالريوس ودراسات عليا..وماجستير
بس هو الحظ اللى مخلينا اكلم ناس زيكم
اتنين بكالريوس ودراسات عليا وماجستير؟!! ماشاء الله عليك يا رأفت.. ربنا يديك الصحة يا بنى
وأنا اللى بولد علشان اتخرج!!
:) :)
يالا! أنا ماشية بقى.. هاروح أكمل الولادة.. قصدى المذاكرة!! مش عايزين حاجة
وبالنسبة للموناليزا.. مش عارفة ليه افتكرت
Da Vinci Code
والفيلم الهندى اللى كانوا عملينه على لوحات الراجل.. بأمانة كانوا مزودينها أوى
هى البنت نفسها شكلها يقرف الصراحة بس اللوحة بتستمد قيمتها من كونها تراث مش اكتر
manal
يامنال
التعليم عندنا سهل وحلو وجميل
مفيش لا حفظ ولا هباب
يعنى مشاريع ابحاث مناقشات وحاجات حلوه كده فعلشان كده اخوكى فلح فى التعليم..
وشكرا على تحليل الموناليزا اللى انت خنقتينا بيه
مفيش اخبار عن العنب
يخرب بيت ام النت
المهم يعنى انتا يا عم الريس خدعتنا
عا ملت امير والاخر كنت عا وز تزوغ
؟؟؟؟ظ
مش عا وز اشتم عشا ن الضيوف
يا ريس
سلا م
رأفت
هههههههه حلوة فعلا انت بدأت الانحراف بدرى قوى
هو الحمد لله انها جت على ضرب خالد وحافظ ربنا رحمه من ايدك ما هو الخنقة جابت الاخر
مدرسة البنات من يومك وانت اخصائى
سجاير ؟ امال لو مش مدرسة عسكرية كنتم عملتم ايه
ودى كانت البدايات التباشير يعنى
يا ترى امريكا كانت تهذيب واصلاح ولا استكمال للمسيرة
طمنى
جحيـــــــم
خد راحتك يامان...الناس اللى هنا من اننا وعلينا ..يعنى مش فارقه ...
----------------------------------
---------------------------------
تــــوتا
التعليم هنا مختلف وسهل وحلو زى ما قلت لمنال
بس اتذكر ان اول محاضره لى هنا..
اتزنقت فى سيجاره..وهنا ممنوع التدخين فى اى اماكن مغلفه..يعنى التدخين يا اما فى الشارع او السكن الشخصى بتاعك..
المهم وانا فى المحاضره..عاوز اشرب سيجاره..عملت فيها الشاب المفتح
وروحت رايح للحمام اللى فى الدور ال13
وقفلت الباب وهات يا سجاير..والحق اقول انى ماكنتش اعرف انى كل دور فيها
سموك الارم( الجهاز اللى هو بيكشف عن الدخان)
وبقدره قادر الدنيا اتقلبت..صفافير فى المبنى كله..والبوليس جه والمطافى
واخلو المبنى لانه مفكرين فى حريقه
وانانزلت تحت مع الناس عادى ولا كأنى عملت حاجه
وكله قاعد يسب وبلعن اللى بيشرب سجاير فى الحمام
انت دايما فضحنا كده قدام الاجانب
مهم امثالك اللى مبوظين صورة مصر فى عيون الاجانب و انا بحملك المسؤلية عن اى اختلافات بين البلدين الشقيقين
sorry last reply is mine but i forgot to sign out from my frnd's account
رأفت سمعت أغنية حسين الجسمي الجديدة يا مان , أسمها باحبك و حشتيني منظرة كدة و اللة أعلم بيغني لمصر دة اللي أنا فهمتة يعني , روح على السايت دة و أعملها Download .
www.egyptsons.com
لا.. هو بالنسبة للتعليم عندنا فمفيش أحسن منه الصراحة!!… هما العيال بيطلعوا أغبيا ومتخلفين عقليا وذهنيا من شوية
:)
تعرف يا رأفت.. أنا من كام شهر كده قابلت صاحبة أخويا الأمريكية لما جت مصر, فلما سألتنى عن دراستى وعرفت أنها أدب انجليزى ونقد وحاجات كده لاقيتها اندهشت وقالتلى: أكيد أنتى مستمتعة بدراستك جدا وأكيد الكلية بتعاتكم بقى بطلعكوا بعثات لانجلترا وأمريكا خلال السنة!! أنا سمعت الكلمتين دول وزى لما يكون جردل ميا ساقعة وقع عليا!! أنا طبعا بقى عشت الدور وقولتلها هو من ناحية الاستمتاع فمفيش بعد كده الصراحة.. شايفة الاستمتاع بينط من وشى ازاى؟ أما بالنسبة للسفر فاحنا مش محتاجين الحاجات دى لأن الكلية بتجبلنا البلاد دى لحد عندنا
:)
اه… فكرتنى بالعنب!! مش انا شفت بعرور ده شكله عامل ازاى أخيرا!! اصله طالع بيغنى فى فيلم جديد وأنا كل ما أشوف اعلاناته فى التلفزيون اتفرش على الأرض من الضحك
هههههههههه
لا بجد يا رأفت شكله شنيع!! تحس انه لسه خارج من السجن حالا.. ده غير الكام( بشلة) اللى واخدهم فى وشه.. بجد مسخرة
manal
هههههههههههههههههههههههههههههههههههههههههههههههههههههههههههههه
فضحتنى ربنا يبسطك ياراجل
ايه ده لا قدوة فعلا
يالهوى ع الدماغ
انت بس اتجوز و خلف و هفضحك عند عيالك زى ما فضحتنى وانا بضحك زى المسطولة
هقولك نكتة ياواد لسه سامعاها امبارح
واحد أمريكى وواحد مصرى فى الحرب
فالمصرى بيقول للأمريكى هم بيدوك كام فى الحرب ؟
الأمريكى قاله باخد مرتبى الأساسى 3000 دولار
و 300 دولار بدل سفر
و 300 دولار بدل أكل
و 300 دولار بدل شرب
و 300 دولار بدل حر ......
فالأمريكى سأل المصرى قاله وانتوا بتاخدوا كام بقى ؟
المصرى قاله بناخد 3 جنيه
الأمريكى قاله ده بدل ايه ده ؟
المصرى قاله بدل ما نسبّلهم
اه كمان معلش هى دى غلطة المدرس انه عايزكم تتعلموا الفن و بيكلمكم عن الفنانيين اما انتو مش وش نعمة و بتتبطروا صحيح
فكرنى ارنك علقه بقى قدام الحاج
:)
صحيح هو الاستاذ سابك تقول على خليفة بيكاسو اللى ما يسواش
بكرة حافظ يتشهر و تقول ياريت اللى جرى ما كان
:(
انا عمري ما ضحكت من مدونه اول مره في حياتي اضحك كده انا تقريبا قريت المدونه كلها
رائع ارجوك استمر
يا جماعة الواد رأفت دة والله فنجري بق
ولا ليه لا في الطور ولا في الطحين
هو بس بيحب يعمل مناظر كدة وحركات
باريس ايه يابو باريس اللي بتروحها
الله يرحم امواتك
خليني ساكتة بقي
مسدس ايه طب خليك صريح وقول ان المسدس اللي كان مع الواد دة مسدس مايا
وبعدين الحاج قرر انك تسافر برة تكمل تعليمك مش خوفا علي مستقبلك
لا دة خوفا علي مستقبل الشعب
عشان انت اللي كنت هتفسدوا
الحاج رجل وطني من الدرجة الاولي
وايه حكاية اتنين بكالوريوس ودرسات عليا وماجيستير دي
احنا هنفشر بقي
طب خليك واقعي
قول واحدة وواحدة
تبقي كدة مبلوعه
تعالي انت بس وانا افضحك فضيحة المطاهر للطلوع علي المعاش وشوف انا هعمل ايه
ههههههههههه
سمسم
لسه ما سمعتش الاغنيه دى يامان...هاروح اسمعها..انت عامل ايه..واخبار البرد؟؟؟
----------------------------------------------------------------------
منــــال
والله انا كمان كنت فاكر انك مستمتعه بالدراسه بتاعتك..ما انتى نازله فينا خنق ..ايشى تحليل شاعرى وايشى روسومات..
انا قلت بحد..انك غاويه الهم ده؟؟؟
اتاريه ياولداه تنسيق الثانويه العامه
والنبى ابقى ابعتى لى صوره بعروره...عمرى ما شفته والله
----------------------------------------------------------------------
بت يا دكتوره ياسمين
حتى نكتك رخمه...وفن ايه وهباب ايه..زى انا ما قلت والله بيقولوا ان الاستاذ حافظ عقله ضرب دلوقت..ربنا يشفيه..
وخلاص..انت اخدت ع الحاج قوى...عارفك يا معلونه..
عاوزه الحاج والحاجه يحبوكى
دماغ برده
----------------------------------------------------------------------
ميـــمو
الف شكر ع الزياره وكلامتك الجميله..
ربنا يزيدك ضحك وفرحه كمان وكمان
----------------------------------------------------------------------
سمراء
مش مهم تصدقى..فى ناس تانيه مصدقه...وبعدين انا لو اعرف انتى بتعرفى فرنساوى
كنت صورت لك ختم دخول باريس..
هههههههههههههههههههه
منه لله التعليم فى مصر...يدوب بتعرفوا تفكوا الخط
لا والله يا رأفت, لا تنسيق ولا بتاع.. أنا كنت جايبة فى ثانوية عامة 98 فى الميه, يعنى أنا مجموعى يدخلنى اللى أنا عايزاه.. بس علشان أنا هبلة وعبيطة وكنت فاكرة أنى هستمتع بالدراسة دى لأنى بحب الأدب والنقد أساسا, رحت داخلة الكلية اللى ما يعلم بيها الا ربنا دى
هى المشكلة فى نظام التعليم كله.. عايز يولع الصراحة!! لو بتحب حاجة يكرهوك تجيب سيرتها حتى
يالا!! حسبنا الله ونعم الوكيل
وصور بعرور جايالك فى السكة
:) :)
manal
رأفتانى
اوعي تكون زعلان مني
اكيد فى محاور اتفاق ومحاور خلاف
لكن الخلاف فى الراي بين الاخوه
لا يفسد للود قضية ولا اية ؟
صافي يا لبن باه وانت برضة الكبير
بتقول عرفت منين انك الكبير ؟
لانك من ايام الاستاذ حافظ والاسم دا اتلغي فى الخمسينات
Iron Cobra:
انا سمعت الاغنية بتاعة حسين الجاسمى
soo romantic
و فيها احاسيس غريبة و جديدة
بتهيالى رافت مالوش فى الكلام ده و مش هيعرف يحس الاغانى دى
انت قلو اغنية بعرور اغنية العنب الفول الكشرى لكن احاسيس و بحبك و حشتينى صعب اوى يفهم الحاجات دى
منــــال
معلش بأه...خلصى الشهاده الزفت دى وبعد كده اشتغلى فى اللى انتى بتحبيه..
انت قولتيها..نظام التعليم وحش وبناء عليه..
الدوله بتخسر ناس موهبيين كتير فى مجالات عديده
كان لى واحد معرفه..موهوب اوى وكان نفسه يطلع مهندس معمارى..مصمم بيوت ومبانى وكده
لكن للاسف ماعرفش يروح الكليه دى فى مصر علشان نص درجه
فسافر هنا ودخل هندسه..وماشاء الله عليه ..
مشارك فى مشاريع جميله هنا نيويورك
فى انتظار بعروره الجميل
الزعيـــــــــــمه
لا طبعا يا جميل انا عمرى مازعلت ولا هازعل منك..
الاختلاف فى الرأى حاجه مفيده وصحيه جدا بين الحبايب..ربنا ما يجيب زعل..
انا جاى قريب ان شاء الله..
وها نتتكلم اكتر فى الموضوع ده
لان اناهنا باسخن ع الامريكان برده لما حد يقول ان مصر مافيهاش غير جمال بس؟؟
المهم لما اجى هنتفاهم
ابعت لى ايميل علشان يكون معايا ايميلك
ماعليـــــــــنا
بأه رافت مالوش فى الاحساسيس
ماشى يا ام لسان طويل..
ايوه ياختى...مالوه بعروره والعنب والكشرى
سيبنا لكم الاحساسيس الجاياشه
وعلي النعمه لنولع لك فى الصيدليه
بجد اظرف حكاية سمعتها من فترة طويلة احيك على خفة دمك
وشكرا لاسعادى
ملك المصرية
ملك المصــريه
ربنا يسعدك كمان وكمان..
وتفضلى تضحكى كده وسعيده علطول يا رب
زورونا تجدوا ما يسركم ..فشر محلات صدناوى وشمله
لا والله يا رأفتاني
وانا في الثانوية كنت طفل برئ
ملاك طاهر
ولا ليا في الطور ولا في الطحين
طب وربنا المعبود اصحابي في اولى ثانوي اللي كانو بياخدو دروس معايا
كانو بيشربو سجاير وجم في مرة قالولي تعالى اشرب معانا
انا عملت مقلب فيهم
ورحت معاهم ومشربتش
ورحت سيحتلهم عند ابهاتهم
العيال من يوميها كرهوني
وربنا لو شافوني هيدبحوني
ياااااااااااه
ايام يا رأفت والله
انما الواحد فسد وباظ لما اتنيل ودخل الكلية
يالا
ربنا يتمم بخير
واحد من الناس
اخص عليك يا مان
هو انت كنت من العيال دى...؟؟؟تروح تسيح ؟؟
بس انتوا يامان كنتوا بتطلعوا بره المدرسه...؟
احنا كنا بعون الله بنشرب فى الفصل...
كانت ايام حلوه؟ لا شغل ولا مشاغل
ياريت كان الواحد فضل كده علطول
ههههههههههه
تحياتى يا غالى
ههههههههههههههه
الله يقطعك يا رافت متشرد طول عمرك
الا بالحق انت كمنت فى مدرسه ايه هههههههههههه
ياريت الواحد يفضل كدة علي طول
انت فاكر ان انت كنت صغير زينا وكبرت
لا دول قشروك من علي الحاجة
وبعدين انا بقي خريجة مدرسة لغات
يعني عارفة الفرنساوي كويس ومش سايباك الا لما توريني ختم دخول باريس
شكلك اصلا لا من امريكا ولا نيلة
انت اخرك يا ابني كفر ابو طشت
ومش عايزين طولة لسان ها :p
ههههههه
همس الليل
ايه رأيك فى جمال عبد الناصر العسكريه
مسخره مفيش بعد كده؟؟؟؟
جمال عبد الناصر يا فاشل ههههههههههه
انت اخرك مدرسه الزراعه اللى فى الراس السودا اكيد تعرفها وبلاش نسيح لبعض بئا ههههههههههههه
تعرف يا واد يا رافتانى جتلى اخبار ان استاذ حافظ لسه عايش هههههههه
وبيبوس ايدك وش وقفا
الحمد لله ان مكنش فى مدرسه بنات جمبكو والا كنتو قطعتو خلفهم
هههههههههههه
همس الليل
طبعا عارف الراس السودا
ياه دى انتى قلبك اسود قوى
الاستاذ حافط اتجنن على ما اسمع
ما اعرفش ايه اللى حصلو
هييييييه دنيا
بقولك ايه يا رافتاني
بما انك مش عايز تدوس في مشروع الأباحة في الأغاني المصرية، ايه رأيك تعمل عدد جديد عن اقتباس المطربين الأجانب من التراث الشعبي المصري؟
انت طبعا عارف ان المطربين في الغرب عواطلية وما وراهمش غير اهم يسرقوا التراث بتاعنا، يعني عند مثلا أغنية
hit me baby one more time
دي مقتبسة من توبة ان كنت أحبك بس قابلني مرة وتبقي دي آخر نوبة.. الخ
والأخت شاكيرا بتقول
i used to cry against the wall but now i've got a shoulder that i can lean on
الحتة دي بقي مقتبسة من المثل الشعبي: ضل راجل ولا ضل حيطة
كدة يعني.. شغل الجمجمة
احا جدا يا عمر
الاجانت هما اللى سرقوا التراث بتاعنا
انت باين عليك خلصت مذاكره وطالبه معاك...انت ترخم على صاحبك
يا صديقى
العدد القادم بعنوان الغتاته فى الغرام
واذا كان الموضوع بتاع سرقه التراث بتاعنا شاغلك
لما تيجى عندنى نروح نشرب معسل ..ونناقش الموضوع ده سوى
هههههههههههههههههههه
صباح الفل
انا عندي هيستريا ضحك هنا
من الموضوع و من التعليقات
الله يسامحك
اروح اذاكر ازاي دلوقتي
ههههههههه
يا عيني ع الاستاذ حافظ
من عمايلك فيه
ايبى
الحمد لله ان انتى بخير
انا قولت برده انها زحمه امتحانات
انا مش عارف انتو ليه بتمتحنوا كتير كده وفى الاخر برده بتتخرجوا مش عارفين حاجه
ربنا يقويكى وتخلصى
شدى حيلك
ههههههههه
عمر شكله كده شارب سحلب عالصبح!! ايه اللى جاب شاكيرا لبريتنى لضل الحيطة؟
كمان عايز تشربه معسل يا رأفت؟ ده هو عامل دماغ خلقة كده لوحده!! ههههه
manal
صح يا منـــال
هو عمـــر عامل دماغ بس لسه انا مش عارف ايه هى..بس هاجيب قراره؟؟
هى طالبه معاه تاريخ على مزيكا على تراث
ربنا يستر والايام دى تعدى على خير
ازيك ياواد
حبيت اسلم عليك
كده من غير سبب
قلة ادب
بعيد عنك
و للا بعيد ليه
اتفضل شويه
هههههههههه
انا حره
طبعا..هو انتى اتهبلت ولا انطسيتى فى دماغك لا قدر الله انكى تسلمى من طوله لسان..ازاى؟ ما يصحش
لازم لسانك اللى عاوز قطعه يعمل عمايله
فعلا مرات الاب العن حاجه فى الدنيا
يا عم انت شكلك كدة تركت محراب الفن
انا عن نفسي حدوس في سكة الأباحة في الأغاني وخاصة اغنية ادخله جوة يطلعلي برة، وأغنية الفنانة المستقيمة اليسا: سلمتلك اغلي ما عندي
وابقي سلملي علي الرقابة
عمــــــــــر
ايه اللى جرى لك يا وريث..
الفن فى دمى يا وريث حتى اسأل بعروره..
بس انت باين عليك مش مضبوط اليومين دول..
ع العموم لما تيجى فى رقاصه هنا اسمها سوسن..من المغرب الشقيق...هنقعدك معاها يمكن تفك ازمتك دى
ولو عاوزنا نضرب اباحه..عادى يامان
هو انا لى اغلى منك
على فكرة البلوج بتاعى عنوانه لتغير.. بقى
albidalife.blogspot.com
ابقى متنساش تغير اللنك اللى عندك بقى يا رأفت
manal
رأفت اصيل يا وله من يومك تحب الخير ليك ولصحابك اهو كدا التعاون
بأه تاخد الواد للرقاصه وقال من المغرب الشقيق
دا انت شيطان يا عم
وبعدين ماهى حته عربى اهو امال عاملنا فيها فيلم الحرمان
ههههههههههه
اه يا منحرف
همس الليل
الله يلعن طوله لسانك اللى عامل زى المبرد ده
عمر حبيبى..ولازم اشوف ماله..هى طالبه معاه اغانى ليه
والست سوسن انسانه كويسه رغم انها رقاصه..
روحى يا شيخه ربنا يهدك
هههههههههه الست سوسن ست كويسه هههههههه انت ادرى بئا عم رافت
خبير والله ياابنى
بعدين عمر حبيبك تعمل فيه كدا اخرتاو تبقى سوسن ههههههههه
ربنا يهدك عشان تبطل سوسن وسعاد وكل حرف السين
يا باشا خير ماعملت
و انا بيتهيئلى انك و خالد بعد كده عجبتكم الحكايه و قضتوها بعد كده على القهاوى
تحياتى
همس
خلاص هنبطل حرف السين
فى رقاصه تانيه فى عماد الدين اسمها أوبــــح
ايه رأيك
---------------------------------
whyme
وحياتك بقينا ناخد غياب الفصل ع القهوه..واللى ما بيجيش بنتكتبه غياب
والله تعبان يا ريس... عندي امتحان يوم الاتنين وطبخت مسقعة من كام يوم والبتنجان كاتم علي نفسي
عمـــــــــــــر
...عدى الامتحان يا وريث
ولما تيجى ان شاء الله هنغذيك..
ابعد عن البتجان والفول والحاجات علشان ما تنمش وانت بتمتحن
يانهار ابيض
بس إحمد ربنا إن خالد فهم وضحك
كان زمانه ساعتها مموتك من الضرب وإنتقم لكرامته
ههههههههههههههه
التعليم خلاص بقا عك والله
فى مدرسة اخويا الولاد كانوا بيضربوا الناظر بالقلم فى قلب الحوش
غير إن اخويا يعمل كل مصيبة والتانية ويروح للناظر يمثل عليه ويعيط بدموع التماثيل اللئيم ده
غير إكياس المياة اللى كانت تنزل على راس المدرسيين طاااااااااش
بس دى كانت مرحلة مقبولة الى حدما
دلوقتى بقا بعد ما اخويا خرج من حمادة لطفى سكوول بقا يقتلوا بعض فيها بلا فخر
حاجة تحرق الدم والله
يوه نستنى
دى اول مرة ليا هنا وإن شاء الله مش آخر مرة .. مدونتينك حلوين اوى
سلام عليكم
Post a Comment