مــــراره الرئيـــــس

(1)

وبعــديــن يا ريّـس

وآخـــرتهـا ايــــه

دول جايبـين مرشح

يغيّــر ويــشرح

ولايــفيــن عليـــــه

(2)

فـقــعولك مــرارتــْك

وحـاسـدين فخــامـتك

وكــُرسى الريــاســـه

عــُيونهـم عليــــه

(3)

الـــهى يا عــالم

بحال الغـلابــه

اشــفلــنـــا الرئيــس

ورجــــع شبـــَابـــُــه

ومَــدد فى عــُمـــره

ويــّسر له أمـــرُه

دا هـــو الحــَمــْـــل

وشعــبُه الديــــــابه

(4)

ودَمــْـــر وكـَســـْر

رُمـــُوز المعـــارضــه

وشـَــتـت جمــُوعـــهــــم

و أسخــطهـــا قــِــردْه

وأنـا متــوضى بأدعـــى

يغــــور البـــرادعــــى

ولا يكـــون لـــه رَدْه

(5)

دُســــتُور دا ايه اللى يغيــّروه

وبــرادعى مين اللى يرشّحــوه

بقى بعد الهنا والرخاء والسعــاده

هنرجــع نغنى يا ناس ظــَلمـــوه

(6)

ما قـــُولت لجنابـــك

بــلاش الجــرايــد

ولازم نــِخــْلص على

من يـُعــارض

لكنــك مســـامح

وقلبك كبير

وشايل هــُموم

الضيعف والفقير

وعـــُمرْك ما تِظلــــم

ولا مـــره تـِحرم

يـا عــايــق يا رايق

وبـــالك طــــويل

نيويورك - مارس 2010

Read More

الدروس المستفاده من مباراه مصر والجزائر

الفريق المصرى فريق اكثر تدينا من الفريق الجزائرى . لو قرأت اى حديث صحفى لاى لاعب او مدرب مصرى هتلاقيهم بيسألوا الجمهور المصرى التضرع لله بالدعاء . على عكس الفريق الجزائر اللى ما جبش سيره ربنا فى اى حوار صحفى

اتضح ان الاخاء العربى والقوميه والملوخيه وغيرها من المصطلحات بتاعه تعيشى يا بلدى يا بلدى تعيشى . ما هى الا كلام فى الهجايص

تضح ان جمال عبد الناصر مازال قادرا على تعكير دمنا فهو صاحب تظريه القوميه وتحرير الجزائر بلدالمليون شهيد ولولاه كانت باريس هى عاصمه الجزائر

الخسران الوحيد فى الفيلم كله هو مختار الجزائرى الحلاق اللى بنحلق عنده هنا فى نيويورك- كل المصرين قاطعوه

Read More

الاكل .. هو سبب كل المشاكل

 

اتضح ان الاكل هو سبب كل مشاكل الانسان العصرى . واحسن شعور للبنى آدم وهو جائع . وان العقل بيعمل فى احسن حالته لما البطن بتكون شبه فاضيه

فى الايام الخوالى لما الانسان كان بياكل من ورق الشجر والخضار والمكسرات كان الانسان فى احسن صحه وعندما تطورنا وانفتحنا على التقليه والزيت والسمنه البلدى والسكر والمسبك والملبك بدأنا نشوف الضغط والسكر والكليسترول وامراض القلب وغيرها واصيب العقل بحالات غيبوبه فجائيه

ومع تنوع انواع الفول تنوعت اشكال غياب العقل والفكر فمع الفول ابو زيت حار توجد الغيبوبه والتتنيح المؤقت . الفول ابو طحينه وتوم وصلصله يوجد توهان وشبه فقدان للذاكره. درجه نظافه زيت الفلال مرتبطه ارتباط وثيق بعمل خلايا الذكاء فى المخ

وقس على ذلك الكوارع ولحمه الراس والممبار وغيرها من الاكلات التى لها صله ورد فعل دائم مع العقل والذاكره والتتنيح بكافه درجاته

البيت المصرى عامه بيت كريم فنحن من الشعوب القلائل اللى بتقدم المكرونه والبطاطس والارز والعيش مع بعض فى وجبه واحده برغم ان فايدتها الغذائيه واحده

وبعد الاكل بنحلى وبعد الحلوى بناكل فاكهه وبعد الفاكهه بنشرب حاجه ساقعه وبعدها شاى يا قهوه. ومع الشاى والقهوه يا سيجاره يا معسل . وبعد السجاير والمعسل ممكن شويه لب او سودانى

لو واحد اجنبى صديق لك عزمك فى بيته مثلا وسألك تشرب ايه وانت قولت له ماء بس. عادى جدا هيجيب لك الماء وهيعرف انه مشروبك المفضل

لكن لو كان اللى عازمك مصرى وقولت هاشرب ماء بس. هيموت على نفسه من الضحك و هيفتكرك بتشتغله . فلابد ان تأكل اى حاجه وتشرب اى حاجه

واتذكر مره عزمت صديق اجنبى فى البيت والوالده كانت طابخه اكل يكفى محافظه اسكندريه والبحيره مع بعض. وجلسنا على المائده وراحت الوالده مقدمه لصاحبى طاجن ارز معمر اقسم بالله يوكل عيله " وقالت له : ده منابك لازم تخلصه"

صديقى كان هيموت مش من الاكل لكن من منظر الطاجن

Read More

الحمد لله

لما تيجى تشكر انسان قدم لك خدمه معينه او صديق عمل معاك واجب او معروف او رئيس لك فى العمل او اى انسان مهما كان صلتك به بستخدم احدى او بعض كلمات الشكر الاتيه

الف الف الف شكر

انا مش عارف من غيرك كنت اعمل ايه

ربنا يقدرنا على رد جمايلك

انت انقذتنى من الورطه دى

ربنا يديم المعروف

انا مش عارف اشكرك ازاى

وغيرها وغيرها من الكلمات الاخرى. وفى ناس بتألف قصايد شكر ومدح. وفى انسان ابلغ من انسان. والانسان البليغ فى اللغه بتكون كلمات الشكر بتاعته معبره عن الانسان الغير بليغ فى اللغه

لكن لما تيجى تشكر ربنا بتقول

الحمد لله

بس هى دى. ربنا عملها سهله وبسيطه مش محتاجه بلاغه فى اللغه ولا براعه فى النحو

من خواطر امام الدعاه

Read More

إسألينى

إسألينى .. حتى السؤال بين الحبايب مش حرام
إسألينى .. دمعه عنيه هتكفى عن كل الكـلام
---
كل اللى نفسك فيه قوليه إوعى تداريه
كل اللى عايزه تسأليه يلا إسأليه
---
مفيش حبيب بيخبى حاجه عن حبيبه
دا كل قلب من قلوبنا عرف نصيبه
---
إسالينى .. خايفه ليه
---
إسألينى عن غرامى وعن هيامى بأحلى حب
إسألينى عن آلامى لما قربك يبقى بُعد
---
لو كُنتى عاوزه تعرفى مقدار غلاوتك ما تقوللى
مش كفايه تكونى نورى وشمعتى فى وسط ليلى
---
لو مش كفايه يبقى لازم تعرفى انك حياتى
..ايو حياتى
---
حبيتك انتى يلى صوتك خلى كل الدنيا نور
حبيت عيونك ياللى صورتك احلى من بدر البدور

Read More

بخاف م الحب

بخـــــــاف م الحب مع إنـى بأحــب بجد

=

ومـش محتــــــــار ولا محتاج مساعده حد

=
لكنى بأخاف من النظره ومن كلمه لا تجرح حد

=

وأطيـر وأنكـر غـرامى اللى ملهــوش حـــــد
=

وكل ما أحاول أتكلم أو أسلم ألاقى فى وشى مليون حــــــد

=
وأعود وأرجع وحيد تانى مع نفسى ومن غير حد

Read More

دبله المحبوب

مْش هاخلعك من إيدى
يا دبله المحبوب
---
كان مَلبْسك يوم عيدى
صَبح النصيب مكتوب
---
جوم الشباب م البلد
وعلقوا الأنــــــــــوار
---
وهنّوا أمى وأبويا
والفرحه ملت الدار
---
ومن يوميها يا دبله
فى إيدى الشمال ملبوسه
---
ولا عمرى افكر تانى
أكون عريس لعروسه

Read More

فادعو له بالشفاء

لم اشعر بالخوف او الوحده قط ... حتى سماع خبر مرض والدى ودخوله المستشفى لإجراء جراحه فى القلب. فبرغم الاستقلال الذى أعيشه منذ صغر عمرى حيث سافرت وانا صغير فى السن واعتمدت على نفسى ماديا وانا فى اوائل العشرينات وتعودت على العيش بمفردى فى بلاد بعيده. فبرغم كل هذا فكنت دائما اشعر بالامان واضع فى ذهنى ان هناك حائط للاستناد عليه وقت اللزوم وكنت دائما اقول لنفسى وايه يعنى لو تركت العمل وايه يعنى لو لم استطع سداد مصاريف الجامعه وغيره وغيره وغيره.. وكنت ابتسم واقول لنفسى فى اسوأ الظروف هاروح ارمى بلايا على الحاج وهو بيت العيله واسع

عند سماع خير مرضه ودخوله المفاجئ للمستشفى شعرت بخوف رهيب وفى لحظه شعرت انى كبرت فى السن الف عام ودار بذهنى الف سؤال وسؤال

لقد علمنى والدى كل شئ واى شئ.. واتذكر عند قدومى لنيويورك تحدث معى قائلا انه لمن السهل ان تضيع وتتوه فى نيويورك .. وانا بكل عبط ارد عليه قائلا.. اكيد فى خرائط للشوارع !!! لكنه لم يقصد هذا .. ولكنه قصد الضياع الاخلاقى وحتى هذه اللحظه كلما اقدمت على عمل اى شئ تذكرت كلماته لى

والآن بعد ان رفض ان يأت لنيويورك لاجراء الجراحه وحيث انى لا استطع ان اكون معه فى هذه اللحظات ..الأن لا املك اى شئ سوى الدعاء... فادعوا له معى بالشفاء

Read More

تليفونى ضاع وضاع معاه ارقامى

تليفونى ضاع ... او بمعنى اصح انا نسيته فين مش فاكر ... المهم ان فيه كل ارقام وايميلات وعناوين اصحابى ... انا اتصلت بالشركه والمفروض استلم واحد تانى بنفس الرقم يوم الاثنين

الناس اللى انا كان معايا ارقامهم من فضلكم ابعتو لى الرقم بإيميل ... لان كل الارقام ضاعت مع التليفون وانا مش حافظ اصلا اى رقم

i have lost my phone some where. the phone had all the contact info of my freinds, so whoever I had his/ her number before, kindley, email me your number agian

Read More

تورونتو ... كنــدا

محطه القطارات فى تورونتو-union station

البرلمان

نافوره امام روجور سنتر

جامعه تورونتو

صوره كنيسه معرفش اسمها

صوره للقناه اللى موجوده بين نيويورك وكندا

متحف الجزم برده

متحف باتا للاحذيه_ آه عملوا للجزم متحف

Royal Alex Theater

Roger Center

Roger Center-احد ملاعب البيسبول لفريق البلو جاىس تورونتو

Flat Iron Building

غيوم

إعلانات كاس العالم للشباب المقامه فى تورونتو كندا

اليافطه دى بتاعه كاس العالم للشباب اللى كندا مستضيفاه

الدنيا كانت بتشتى- صوره من العربيه
صوره البرج بالليل

البرج ده فيه مطعم بيلف برج السى ان- اشهر حاجه فى تورونتو

CN Tower- Toronto+ الاوبرا

اى واحد عايش فى امريكا ما بيفكرش فى كندا على انها بلد مستقل بذاته..احنا بنفّكر فى كندا على انها
ولايه امريكيه.. وكندا بلد فى حالها لا بيها ولا عليها ... كندا لازلت تحت التاج البريطانى زى استراليا كده ... وكندا لها رئيس وزراء اقطع دراعى لو لقيت عشر اشخاص يعرفوا اسمه ايه.. وفى كندا مدن تتحدث الانجليزيه ومدن اخرى تتحدث الفرنسيه
ايام زمان قبل احداث سبتمبر كان كل اللى تحتاجه علشان تسافر كندا هو رخصه القياده فقط لا غير.. دلوقت لازم ناخد معانا البسبور .. المهم انا كنت فى زياره لكندا اليومين اللى فاتوا دول وبالتحديد تورونتو.. وهى مدينه جميله ونظيفه جدا وواسعه وتقريبا مفيهاش ناس كثيره اوى.. والناس اللى قابلناهم فى تورونتو كانوا فى منتهى الذوق .. وفى تورونتوا اغلبيه اسيويه ( هنود- صنيين- كوريين) معظم العرب اللى فى كندا تقريبا موجودين فى مونتريال

Read More

عندما تاهت فلسطين بين حماس وفتح

عندما كانت حماس حركه مقاومه تسعى لتحرير الارض المحتله كانت تحظى باحترام جميع الشعوب العربيه وليس طبعا جميع الحكومات

وعندما فازت حماس بتشكيل الحكومه الفلسطنيه.. تشتت افكارها من تحرير الارض والمقاومه الى الكراسى والمناصب

حماس فرّقت الشعوب العربيه بعدما وحدتهم.. فتجد الآن فريق مؤيد لحماس وآخر معارض. كان الجميع يحترم حماس او على الاقل يتعاطف مع غرضهم فى تحرير الارض.. اعضاء حماس حملوا البنادق والمدافع فى وجهه اعضاء حركه فتح المريضه التى لا رجاء منها.. ولا من رئيسها العبيط.. حتى فى مجتمع المدونين تجد من يمجد فى حماس ومن يلعن اجدادها.. فى الماضى .عندما كانت حماس حركه مقاومه من الصعب ان تجد مدونه تسب وتلعن حماس

على حماس واسماعيل هنيه الرجوع الى المقاومه وترك الكراسى والوزارات العبيطه التى لا أمل منها.. الكراسى لها اصحابها..أناث حبوا الدنيا واستقروا لها فحبب الله لهم الحياه. اما المقاومه فلها اناث حبوا لله واشتروا الاخره ورموا الدنيا وراء ظهوره

Read More

حفله سعاد ماسى ومقاطعه الهبل والمجانيين

فرحت كثيرا بنجاح حفلات سعاد ماسى فى مصر. وكنت واثق تماما ان مثقفى مصر لن يسمعوا لحملات المقاطعه التافهه. فقد قيل ان سعاد ماسى تنوى القيام بإحياء احدى حفلاتها فى تل ابيب ولذلك يجب مقاطعه حفلاتها فى مصر

اذا كانت سعاد ماسى ستحيى احدى حفلاتها فى تل ابيب فلمن ستغنى؟ كانت ستغنى لعرب 48 وهم مواطنون فلسطنيون تجنسوا بالجنسيه الاسرائليه وهذا ليس مجال المناقشه الآن

ما هى الفائده التى سوف تعود علينا كشعب وامه اذا قاطعنا حفلات سعاد ماسى؟ فهى مجرد فنانه ووجهتها السياسيه تعبر عن شخصها فقط

فما جدوى المقاطعه والجعجعه الفارغه؟

نحن تعودنا على المقاطعه بغض النظر عن نتائج هذه المقاطعه. قاطع وخلاص مش فارقه

هناك فروق كبيره بين المقاطعه العبيطه والمقاطعه المدروسه العواقب. فلقد سمعت نداءات بمقاطعه استفتاء تعديلات الدستور ونداءات بمقاطعه انتخابات مجلس الشعب والشورى. ورغم معرفه نتائج هذه الاستفتاءات مسبقا فمن الاجدى هو الذهاب لهذه الاستفتاءات وادلاء الرأى. اصبحنا نقاطع اكثر مما نتفاعل.. لدرجه اننا اصبحنا نعيش فى قوقعه محكومه بالمقاطعات الواهيه التى لا منفع منها سوى ابعادنا عن العالم

عند الاختلاف فى الراى مع جهه معينه.. اسهل شئ هو اطلاق حمله للمقاطعه بدلا من محاوله تفسير هذا الرأى واقناع الغير بوجهه نظرنا. وفى رأى هذا النوع من المقاطعه ما هو الا سلبيه وروح مهزومه

أى مقاطعه او نداء بالمقاطعه لابد ان يكون مدروس ومحدد. لابد معرفه والتأكد من نتائج المقاطعه. واننا سوف نستفيد من هذه المقاطعه وانها سوف تعود بخساره او على الاقل لفت نظر من سنقاطعه.. اى مقاطعه لا تتوافر فيها هذه الشروط فى مقاطعه عبيطه من نوعيه خدوهم بالصوت لا يغلبوكم

واتذكر ان صديق حنجورى لى قرر ان يقاطع ابيه فى سنوات الدراسه الاعداديه لان والده لم يخبره بتغير الساعه للتوقيت الصيفى وان هذا الصديق راح اطلطع امام المدرسه ساعه بحالها قبل الميعاد

ابو صديقى فرح جدا وقال بركه يا جامع لان هذه المقاطعه سوف توفر له المصروف اليومى الذى كان يعطيه لصديقى

هذا هو النوع العبيط من المقاطعات..بالضبط كمقاطعه حفلات سعاد ماسى

جعجعه على الفاضى

Read More

يــــــــــوم الأحــد

طول عمرى بأكره يوم الاحد مثل كرهى لكاظم الساهر. ولا ادرى ما العلاقه بين الاثنين. يوم الاحد طول عمره يوم رخم. ايام ابتدائى كان اطول ايام اليوم الدراسى. وكنت دايما اقول لنفسى أيوووه لسه النهارده الاحد. ده فاضل يجى سنه على يوم الجمعه. وفى ايام اعدادى وثانوى كان برده يوم الاحد يعتبر ارخم ايام اليوم الدراسى. كان دايما فى يوم الاحد سبعه حصص. والحصه السادسه والسابعه بتكون مواد رخمه جدا كرخامه يوم الاحد نفسه.. فتجد التاريخ والجغرافيا والتربيه الوطنيه والقوميه وكل التربيات التى لا علاقه لها بالعالم الخارجى. فى الاسكندريه كل المحلات او معظمها بيكون مغلق فى يوم الاحد ولا ادرى ما الحكمه فى ذلك..ناس بتقول انها عاده ورثناها عن اليونانينن والخواجات اللى كانوا عايشين فى اسكندريه. وبعد التخرج والهجره. لازلت اكره يوم الاحد. فهنا فى نيويورك الطرق معظمها بيكون فاضى. والمواصلات العامه مثل المترو بتكون خاليه تماما.. والشوارع فى منتهى الهدوء كأنك ماشى فى بلد بعد حدوث عاصفه او زلزال. وكم اكره هذا الهدوء. ومما زاد من كرهى ليوم الاحد انه بيكون اخر يوم فى الويكيند يعنى اليوم اللى بعده اللى هو يوم الاثنين بيكون صابح اول يوم شغل فى الاسبوع الجديد

Read More

الاكـــل الهندى والانتحار

اصبح الدستور والقوانين والحياه المصريه اشبه باكله هنديه شهيه.. والاكلات الهنديه ما هى الا بهرات كثيره جدا مٌضافه الى العنصر الاساسى فى الطبخه سواء كانت لحوم او اسماك او خضروات
فنادرا ما استطعمت طعم اللحوم ... كل الذى تسطعمه هو طعم البهرات والفلفل الحار.. هذا ما يحدث لنا كشعب
ضعنا فى البهرات الدستوريه والقوانين المفصله وتسلخت جلودنا من شده حراره الظلم واللا مبالاه الحكوميه

والحق اقول ان اعظم سياسى فى التاريخ لا يستطع التكهن بما هو آت لهذه البقعه من الارض التى طالما حبها قلبى

عٌصبه مٌختاره من أٌولى الامر يعرفون ما سوف يحدث لهذا البلد الطيب لانهم يقومون بتخطيط ما هو فى مصلحتهم وليس فى مصلحه الشعب

واى شخص متفائل او حسن الظن بالمستقبل يعلم جيدا ان المستقبل مرير وان هذه الفتره من تاريخ المحروسه تعتبر اسوأ الفترات بلا منازع

المواطن البسيط ليس بيده شئ سوى الدعاء والحسبنه
المثقفون يكتبون والحكومه تسمح لهم بذلك على سبيل اثبات حسن النيه.. مظاهرات واعتصامات واضرابات لن تؤثر.. فالسجون والمعتقلات جاهزه اذا تخطت المظاهره الحد المسموح به.. حقوق الانسان والحريات ما هى الا كلمات رقيقه تضيف للحكومه رونق وبرستيج

الشرطه محكومه بيد من حديد.. عساكر الامن المركزى يؤمنون بان هؤلاء المشاغبون ما هم الا اعداء للوطن ( الله يرحم احمد زكى)...ما حدش يقولى ان هؤلاء الجنود اظهروا تعاطف فى كثير من المظاهرات .. لان التعاطف وحده لايكفى.. يا فرحتى بالتعاطف.. يا فرحتى على قلبى معاكم يا شباب.. شدوا حيلكم

الجيش المصرى مات... بعد ان كان الجيش المصرى مليئ بالمفكرين والكتّاب والشعراء ..اصبح الجيش مليئ بالجهله الذين دخلوا هذا الجيش بواسطه وليس بالكفاءه.. فجميع الضباط فى الجيش تم اختيارهم حسب عيارات محدده ولذلك لا امل منهم فى ان يثوروا او يغضبوا

فى تقرير للكونجرس الامريكى عن المعونه الامريكيه لمصر وفى تقرير فى جريده النيويورك تايمز.. اتضح ان اعلى مرتبات واعلى مستوى معيشه فى مصر المحروسه من نصيب ضباط ولواءات الجيش

واللى ما عرفش طعم الجوع ... عٌمره ما هيفكر انه يدور على طعام واللى طول عٌمره مأنتخ ويملك معلقه ذهب عٌمره ما هيفكر فى اى شخص آخر.. فهؤلاء اللواءات نسوا معنى الغضب وتناسوا معنى العدل

والحل ... حيث انى اسود القلب وغير متفائل.. اعتقد ان الحل هو يا اما التعود على الاكـــل الهندى يا اما الانتحار وفى كلا الحالتين انت الخســـــــــــــران

Read More

شكرا لمن قال نعم

اعلان هام

====

يعلن الحزب الوطنى عن شكره الجزيل لكل من قال نعم

ويشكر ايضا كل ما قال لا

ويخص بالشكر امه نعيمه لانها قالت نعمين

احا يا بلد

====

فى امريكا بيقولوا ان نسبه الاقبال ع الاستفتاء اقل من 26 فى المائه

فى مصر المحروسه بيقول اقبال منقطع النظير

فى بعض البقاع من دول العالم الاخر

بيقولو ان الاستفتاء لسه الاسبوع اللى جاى

Read More

الاغانى للرأفتانى

العوامل الجغرافيه لها دور كبير فى العشق والحب وخلافه فمثلا الحاج محمد عبد المطلب قال (ساكن فى حى السيده وحبيبى ساكن فى الحسين وعشان انول كل الرضا يوماتى اروحله مرتين) وعلى ايام الحاج محمد الظاهر ماكنش فى موصلات لان المسافه من السيده للحسين مش محتاجه العويل واللطم دا كله. امال لو كان هوه ساكن فى الهرم وحبيبه فى مدينه نصر مثلا كان عمل ايه

والعبقرى احمد عدويه خطى على نفس الخطى الجغرافيه حيث قال( سعيده يا حلوه سعيده..موصلاتك بعيده .. أؤمرى وانا اجيلك ماشى ..لما لمصر الجديده) وذكاء عدويه انه مقلناش انه هيمشى لمصر الجديده منين بالضبط. فترك تحديد نقطه الانطلاقه لخيال السامع ودى نقطه ذكيه جدا من عدويه علشان يخلى كل واحد يحط نقطه الانطلاقه الخاصه بيه ولو انى اشك ان اى احد من عشاق عدويه يعرف اى حد ساكن فى مصر الجديده

ومن الناحيه الاقتصاديه مثلا نجد المطريه مروه اللى واخده الدنيا بصدرها تقول فى احد اغانيها ( فيها ايه لو اكلم صاحبك .. ليه تخلى الغيره تصاحبك) وهو دليل اقتصادى قيّم للتوفير. فالست مروه عايزه تخدم حبيبها وصاحبه فى نفس الوقت وهى بذلك تكون وفرّت طاقه فتاه اخرى للقيام بنفس المهمه الاقتصاديه المقدسه.
وقد حذى على حذو مروه مطربات كثيرات ذوات عقليه افتصاديه فزّه فشر اتخنها عالم فى الاقتصاد والتوفير. فمنهن نجلا ونانسى وهيفاء واليسا ورغم اختلاف الشكل وحجم الشفايف والاعضاء والقطع البلاستيك المزروعه الا انهم اجتمعوا على الاقتصاد والتوفير فى حجم الملابس المستخدمه. فكلهن اجمعوا ووافقوا انهن يعروّا اجسادهن فى سبيل توفير الخامات الضروريه لصناعه الملابس للمساكين والمحتاجين

وفى نظريه اقتصاديه اخرى للخبير محمد رشدى حيث حمل على كتفيه المشكله السكانيه وخطى خطوات جريئه لم يخطوها خبير التخطيط كمال الجنزورى ففى احدى اغانى رشدى الاقتصاديه قال ( قلبى يا قلبى يابو الحياره.. والله لاعملك شارع وحاره .. واحط نخله م الورد الاخضر وحبه حبه تصبح عماره) يا سلام يا رشدى. مش هيبنى اى عماره جوه قلبه الواسع اوى. دى الشارع اللى هتبقى فيه العماره , هيكون فيه شجر وورد وخضره و ممكن كمان يجيب تصريح من الحى ويعمل نافوره فشر نافوره قصر المنتزه

والى لقاء اخر من الاغانى للرأفتانى مع الاعتذار للأصفهانى الكبير

Read More

مظاهره الابطال الاطفال

امبارح بعد الشغل روحت اللبيت و فتحت قناه الس ن ن. والحق اقول ان لغه الاعلام الامريكى عن الحرب اتغيرت زى ما تقول ان الشعب اتخنق والمواطن العادى فى قمه الغضب من المستنقع اللى الحكومه وضعتهم فيه
المهم ان على التليفزيون شفت مظاهره لاطفال فى مناطق عربيه مختلفه وعلى الرغم من الحزن الشديد من مشاهد الدمار فى لبنان الا انى كنت فرحان جدا لما شفت هؤلاء الاطفال بل قل هؤلاء الرجال و فى عيونهم نظره ثقه مش موجوده عند اطخنها حاكم من اصحاب الكروش
هؤلاء البطال كانوا اكبر من سنهم. كانوا عارفين ان الكاميرا بتصورهم لكن كانوا ماشين فى الطابور ولا اجدعها عسكرى فى البحريه البريطانيه. اسرائيل فتحت على نفسها باب جهنم. الجيل الجديد كله اللى حكامنا بيسموه جيل السلام هيطلع شايل فى قلبه و معبى على الاخر
و اكيد واحد من الاطفال دول هيكون من سلاله صلاح الدين. والطفل الموعود هيكون عنده كرامه من بتاعه ايام زمان . والله الخير قادم لا محاله ويا ويله يا سواد ليله اللى هيقف امام الطفل الموعود

Read More

فى بهو الفندق ..ملعون ابو السياسه ياعم

فى احدى فنادق نيويورك الشهيره قابلت دكتور فى السياسه الدوليه
هدا الدكتور من مواليد شبرا ـ القاهره. وكان هدا الدكتور المحنك بيشتغل مستشار سياسى لامير احدى الدول العربيه
وكان الدكتور كبير فى السن وهادئ الطباع واواضح عليه انه ابن ناس
المهم ان ايام زياره الدكتور كانت نفس الايام اللى اعلن فيها الرئيس مبارك ان انتخابات الرئاسه سوف تكون بالاقتراع المباشر مع تعديل الماده76 من الدستور
وانا قلت اعمل حوار مع الدكتور ورحت سائله عن رائيه فى تعديل الماده وعن الانتخابات وكان الدكتور جالس فى بهو الفندق ومعه شنطه اوراق صغيره فى يده
وزى ما اتقول ان عقرب لدغ هدا الدكتور او انى والعياز بالله سبيت امه
رمى الدكتور الشنطه على الارض واصابته حاله من الهياج والتشنج وقالى انتخابات ..انتخابات ياخى ها ها وخرج الدكتور عن وقاره وبدأ يشتم فشر اجدعها عربجى فى موقف الكارو.. انتخابات ايه ياابنى انت لسه صغير ماانتش عارف دى بلد بيحكمها العسكر من سنه 1952
انتخابات قال هاها..الدكتور صوته اصبح عالى والناس بدإت تلاحظ وانا كنت عاوز اضرب نفسى ميت جزمه بلاستيك ماركه الكلب لانى سالته عن الانتخابات
اتضح ان هدا الدكتور هاجر بعد ثوره يوليو وكان ايامها فى اولى جامعه وكان شايل فى قلبه ومخبى لحد انامانكشته
لم يتوقف الدكتور عن السب الا بعد وصول امن الفندق والامن الخاص به وكنت انا هالبس اسود لولا انه شرح للامن انه بيناقشنى فى موضوع وانى لم اسبب له اى ضيق

شكرا عرب تايمز على الصوره

Read More

هو فين الجيش اللبنانى

سؤال برئ والله ولا اقصد به شئ. هو فين الجيش اللبنان
ولا حزب الله هو الجيش اللبنانى . انا اقصد هل يوجد مصدر اخر للمقاومه بجانب حزب الله ماهو مش معقول تكون دوله لبنان معندهاش طياره واحده تقوم تعمل اى منظر
ماهو لو عشمانين ان اى حد تانى هيدافع عنهم تبقى مصيبه كبيره
احنا كمواطنيين غلابه على باب الله مفيش فى ايدنا غير التبرعات او المظاهرات او المدونات لان الحكام بتوعنا الله يكون فى عونهم لسه بحضروا للقمه الطارئه .ما انا ياجدعان ها اتجن مفيش اى منظر من اى حد دا حتى المظاهرات ممنوعه والسعوديه منزله فتوى بتحريم مساعده حزب الله
يعنى فى اى حل بخلاف ان احنا نضرب دماغنا فى الحيطه

Read More

عناوين الاخبار

ـ شعبان عبدالرحيم يسجل اغنيه للبنان
ـ حسناوات يتنافسن فى شرم الشيخ للفوز بملكه جمال العرب
ـ فتاوى سعوديه تحرم مسانده حزب الله
ـ ارتفاع اسعار البنزيين فى مصر
ـ جمال مبارك: الاستفاده بالزياده فى الاسعار لدعم الخبز والمدارس والصحه
ـ المصرى اليوم: تسميه ميدان رمسيس بميدان مبارك
ـ الفياجرا المصريه فى الاسواق
ـ فشل مجلس الامن باءدانه قصف اسرائيل لليونيفيل

هده عناوين الاخبار فى الصحف العربيه
غطينى وصوتى يامه

Read More