يا دَاستــــــتور الهنـــا...يا رتنى كنت أنا

فى اى بلد محترمه.. بيطلع دين ام رئيسها علشان يعدل فقره او بند او سطر من الدستور ... فى بلاد بتاخد سنين وسنين علشان يشيلوا نقطه او يحطوا فصله فى احدى فقرات دستورها ... اتذكر ان الموكوس بتاعنا هنا بوش افندى علم الغزل.. بقاله اكثر من 6 سنين عاوز يحط تعديل على قانون المعاشات ...لكن الكونجرس مطلع دين ابوه .. كل ما يحاول يفبرك القانون .. يطلع له ميت عفريت.. لكن فى مصر التى فى خاطرى ... عصابه احمد فتحى سرور ...وافقوا وبالاجماع باكثر من 315 صوت انهم يغيروا نصف الدستور علشان الوريث ... والحق اقول انى اشعر بالخزى والعار لانى لا اعرف دستور بلدى الام ...واحفظ عن ظهر قلب دستور بلد المهجــر ... والعيب مش فى انا لانى حاولت ادور على دستور مصر التى فى خاطرى ..بس لقيت التعديلات اكثر من الدستور نفسه

فتجد مثلا تعديل بتاع

دستـــورنا ستايره حرير

من نسمه شوق بيطير

وفى تعديل آخـــر كان حصل عليه مظاهرات .. آلا وهو

يا طالعه من باب الدستــور .. .وكل خد عليه خوخه

ونجد التعديل اللى جنن الشعب بكل فصائله ... وهذا هو تعديل

دستور وحياتك دستور ...ولاخر الاسبوع دستور

وكانت خاتمه الكلام وعبير التغيرات والتعديلات

إش إش إش ... عُمر ك شوفتش دستور باربع عجلات كوتش

مبروك عيك يا زين يا عم السواقين

عقبال لما تسدد ... القسط والتأمين

Read More

عـلمنى الخيــابــه يا أحمـــد

تقرير وزاره الخارجيه الامريكيه بخصوص الديمقراطيه والحريات فى مصر مليئ بما يجعل الولدان شيبا
قمع حريات..محسوبيه..وساطه
رشوه..ظلم.. فساد فى معظم الوزارات
بلطجه رجال الشرطه ..تعذيـــب
فبركه تحقيقات..قمع المعارضــه..الرقابه على المواقع الالكترونيه
تقييد حريه التعبيــر والانتخابات
وغيرها من البلاوى اللى موجوده من ايام الزينى بركات

ومن ضمن هذه البلاوى..ان السجون المصريه غيـر جيده التهويه والحاله الصحيه لدورات الميـاه غير صالحه للاستخدام الآدمى

أحمد بيه ابو الغيط وزير الخارجيه الهمام..ساب كل البلاوى اللى فوق دى ومسك بإيده وسنانه فى نقطه تهويه السجون

وعلى رأى المثل: فى واحد عبيط راح لابوه وقاله ..علمنى الخيابه يا آبا..ابوه قاله روح فى الهايفه واتصدر

اهو هوده اللى عمله احمد بيه.. راح فى الهايفه واتصدر
احمد بيه اتصل بالسفير الامريكى فى قاهره المعز يؤكد له ان حالات السجون بخير وعلى ما يرام..وان التهويه جيده جداَ فشر مدينه الشيخ زايد

احمد بيه كان عاوز يحلف بالطلاق ان كل دى اشاعات وان السجون بحرى وترد الروح..لكن احمد بيه راجل دبلوماسى صايع وعارف ان الحلفان بالطلاق و الكلام ده مش هيجيب نتيجه..احمد بيه عارف ان مصداقيه الصوره..اقوى من مصداقيه السمع او الكلام..فراح عامل ايه..؟؟ بعت سى دى بتاع انتهاك عرض عماد الكبير للسفير علشان يوضح له ان مساحه غرفه التحقيق كبيره اوى..فما بالك بالسجن وان كل سجين له عصى مقشه كبيره للاستخدام عند اللزوم

احمد بيه يا اما بيستهبل يا اما واكل ام الهبل..
اعضاء مجلس الشعب طالع دينهم استجوابات بخصوص الفيلم الاسرائيلى بتاع قتل الاسرى المصريين وده مطنش وقاعد يشرح ان السجون بحرى وهواه مفيش زى كده

احا جدا يا احمد بيه

Read More

عيد الحب...ورمانيسه العبط والدباديب

عمرى فى حياتى ما كرهت عيد بعد عيدى الشرطه وعيد القمح قدر كرهى لعيد الحب..او الفلانتين دى
وعيد الحب مهما اختلف اسمه او تاريخه هو نفس العيد الرخم الذى لا يحمل اى معنى وفى نظرى لا يدل على اى شئ سوى العبط
فى نيويورك تجد كل شحط واخوه يحمل من الورود والازهار ما لا يستطع حمله كتيبه امن مركزى
وبجانب الورود تجد شيكولاته وشمبانيا..وما حل وطاب من اللذات والمسكرات
فى قاهره المعز تجد كل فحل واخوه ..شنبه ممكن ينفع يتعمل منه مكنسه او حائط شائك ..شايل دبدوب ابيض وماشى بيه فى الشارع وفرحان اوى..كانه جاب الديب من ديله
وبقدره قادر يتحول ويتغير لون قاهره المعزمن اللون الترابى اللى اللون الاحمر..فشر يوم الاهلى ما اخد كاس افريقيا
وبرغم اختلاف السعر واللغه والمكان والزمان..الغرض من الدباديب والورود والازهار والشمبانيا والشيكولاته هو نفس الغرض
فى قاهره المعز..سى روميوا طمعان فى بوسه آخر الليله
فى ينويورك وغيرها من العواصم الغربيه..سى روميوا طمعان فى ما هو اكثر من البوسه
وعند سؤال اى شحط او حلوف من حمله الدباديب والازهار عن السببب فى شراء كل هذا ...يرد وعينها كلها احاسيس وعواطف كانه ضارب عشره كيلو حشيش..ويقول..عاوز ابين لها حبى
ونسى هذا الحلوف الدبدوبى.. ان الحب ليس بالدباديب والورود ..الحب هو فعلا ان تحب..لان اللى بيحب بجد..مش محتاج انه يبين حبه ويشترى دبدوب
جاتكم نيله ..رجاله تعر

Read More

لظــــروف الســـــــــــــــــفر

مٌـــغلــــــــــــــــــــــــــــــــــــــق

لظـــــــــــــــــروف الســـــــــــــــــــفر وخلافــــــــــــــــــــــــــــــــــه

الناس اللى انا معايا تليفونتها وانا حاسس انهم عاوزين يشوفونى بجد هنتصل بيهم علشان نسلم على بعض ونحط الوشوش ع الاسماء

الناس بتوع سيدى ابراهيم.. هنخبط لكم زياره انا والسياح اللى معايا علشان نزور ابو طاحون.. والحدق يفهم

الناس بتوع اسكندريه.. هى عزومه عند محمد احمد.. وواحد قهوه فى البن البرازيلى..مش عاوز اسمع سيره ابو اشرف وقدوره

الناس بتوع القاهره..هى عزومه عند الجحش يا حجر معسل فى وسط البلد.. يا ساندوتش عند زيزو نتانه

الناس بتوع الاقاليم .. ربنا معاكم..اذا كانت الحكومه نسياكم يبقى انا اللى هافتكركم....ربنا كريم ادعوا انتوا بس

استودعتكم الله الذى لا تضيع ودائعه

Read More

فى بلاد العجائب

القوانيـــن الرأفتــــانيه

مصر التى فى خاطرى غيرها غير كل البلاد.. مصر التى فى خاطرى مليئه بالعجائب العجيبه.. ولو كانت المرحومه آليــس لسه عايشه كانت عملت فليمها الشهير فى مصر بدل آليـس فى بلاد العجائب

مصر التى فى خاطرى ملئيه بالقوانين التى تحمـى حق المواطن البســـيط وتعمل على ذياده الدخل ونماء الجسد
وحــلاوه الروح وانشراح السرائر وانفراج الخواطر وحمايه الحريه وتسليك المناخير وتعريض القفا وقطع اللسان
ففى مصر المحروسه تجد

قانـــون الطوارئ
الجميــل اللى عامل زى نسمه بحر اسكندريه فى ساعه عصارى
ولولا هذا القانون لوجدت كل الناس ماشيه ع الكورنيش فى سعاده وسرور ومش لاقيه اللى يلمها

قانـــون الاحــزاب
هذا القانون فتح طاقه النور لاحزاب عديده..زى وعلى حزب وداد قلبــى يا بوى وعلى حزب الريح ما يودى الريح مايودى وحزب النبى حارصه وصاينه

قانـــون اللى ملوش ظهر يطلع عين اللى خلفوه
والقانــون ده بالزات معمول علشان حمايه الناس الغلابه زى المناضل ابـراهيم نافع و الفدائى سمــير رجب لان من غير القانون ده, كانت الناس دى ماتت من الجوع

قانـــون النشــــــر
قانون حريه الرأى والحمايه الفكريه.. ولولا هذا القانون لانقرضت كل الصحف وخصوصا صحف المعارضه
زى الاهــرام والاخبــار والجمهــوريه.. وكنا اتحرمنا من كتّـــاب معارضين زى اسامه سرايا وكـرم جبــر
والتوتو بــكر والرائع الاستاذ الآنّــا ابو زيد وشيخ المعارضه العملاق كمال الشاذلى

قانـــون الموت علينا حق
وهذا القانون من اجمل القوانين على الاطلاق.. والمفروض كل مواطن يعلق فى بيته صوره من هذا القانون... وانت نازل من البيت الصبح تفتكر القانون ده.. مثلا لو رايح تركب القطار او اى وسيله مواصلات.. افتكر قانون الموت علينا حق لانك ممكن ما ترجعش.. ويا ريت كل واحد معاه تليفون محمول.. يخلى الرنه بتاعته.. قانون الموت علينا حق

قانــون انا وابن عمى ع الغريب
وهذا القانون معدل سنه 81 .. الاصل بتاع القانون ده بيقول انا واخويا وابويا وامى وعمــــــو حبيب على الشعب اللى عاوز يتربــى

قانــون اللى على راسه بطحه
وبرده القانون ده تم تعديله من الاصل بتاعه اللى هو اللى بيته من زجاج.. ما يحدفش الناس بالطوب
والقانون معمول علشان كسـر العين .. حتى اسألوا حســام ابو الفتوح.. صفاء ابو السعــود .. طلعت السادات

Read More

انا وابن عمى

لى ابن عم فى سنى..وكان دايما معى فى نفس الفصل ونفس المدرسه لحد اول ثانوى عام كده لما انا سافرت
خالد ابن عمى كان مهمل شويه.. يعنى مفيش كتب مفيش كراسه مفيش قلم.. عادى يعنى.. كان بيجى الفصل اثبات حاله وكأنه بيعمل جميل فى وزاره التربيه والتعليم
وكان لنا مدرس رسم اسمه الاستاذ حافظ.. وكان الاستاذ حافظ مفكر نفسه بيكاسوا .. وكان بيصدعنا بالفن والفنانين ولوحات .. ومتاحف وغيرها من الحاجات اللى بتخنق.. وكان نص الفصل يا اما بيذاكر ماده تانيه مهمه.. يا اما بيشربوا سجاير ورا
المهم ان فى احدى الحصص.. الاستاذ حافظ زعل ان خالد ابن عمى ماجبش كراسه الرسم ولا الالوان بتاعته.. والاستاذ حافظ وقف خالد فى وسط الفصل وقاله

انت ليه مش زى ابن عمك الرأفتانى ملتزم وبتجيب اداوات الرسم معاك
وأنا قاعد جنب خالد والاستاذ حافظ قاعد يهزأه وخالد ابن عمى اتخنق منه ع الاخر

والاستاذ حافظ قالى يا رأفتانى.. انا احترت مع ابن عمك ومش عارف اعمل ايه معاه.. ياريت تخليه يلتزم زيك

انا كان لازم انقذ الموقف لان خالد كان على شفا انه يطلع المطواه ويخبط الاستاذ حافظ سن ويريح المدرسه والمنطقه التعليميه من قرفه

اقوم انا اعمل ايه؟
اقوم اقلع الجزمه وافقع خالد ابن عمى جزمتين على دماغه
واقوله : كده يا ابن الكلب... كده
جايب لنا الكلام من اللى يسوه واللى ما يسواش

خالد ابن عمى نام ع الارض من الضحك
وانا شغال ضرب بالاقلام والجزمه وهيصه ما تقولش عركه فى سوق زنانيرى

الاستاذ حافظ قعد يسلك فينا ويقولى خلاص ... الكلام ده فى البيت مش هنا... خلاص كده كفايه
وانا اقول .. لا يا استاذ حافظ .. لا انت مش عارف الولد ده بقله التزامه عامل ايه فى والده؟ دا عمى خلاص غلب معاه وقرب يموت

وصممت ان اخد خالد واروحه البيت علشان اكمل العلقه هناك ويكون ابوه حاضر المعركه

ووافق الاستاذ حافظ.. ما هو عاوز يخلص مننا... وطلعت انا وخالد طيران على قهوه عم حسنى نستنى مدرسه البنات لما تطلع

Read More

فى ذكــريات تحضير الشنط

الحاجه ام الرأفتانى.. اطيب من الطيبه.. وده يرجع لجذورها الريفيه الكريمه..فرغم زحمه المدن من اسكندريه والقاهره وحتى السفر لنيويورك..الا انها مازلت الست الطيبه اللى بتحب الناس كلها..والحاجه لما تفرح تعيط..ولما تزعل تعيط..لما اسافر واسيبها تعيط..لما ارجع م السفر تعيط...اخود البكالريوس تعيط..ماجستير تعيط..وده سبب خلانى افكر جادا انى اعمل الدكتوراه..يمكن تغلط وتزغرط

واتذكر مره واحنا فى نيويورك..كنا رايحين مطعم وكان فى ناس يهود..وقلت لها ان الراجل اللى قاعد ورانا ده..يهودى.. فالحاجه مصمصت على شفايفها... وقالت يا عينى..يا حول الله يا رب.. ما تقولش ان الراجل عنده جرب ولا حاجه

والحاجه طيبه اوى.. وفاتحه البيت بتاعنا وكاله..اللى الرايح واللى جاى يدخل ..ولازم تحلف ميت يمين انهم لازم يكلوا.. او يشربوا ..وفى اغلب الاحيان..لازم يكلوا ويشربوا.. ولو كان مسموح كانت تحميهم كمان.. وانا لما كنت بابعت حاجات من نيويورك هنا مع اصحاب لى نازلين مصر..كنت با حذرهم ..انهم مايكلوش يومين قبل مايروحوا للحاجه..علشان الحاجه لازم تطبخ لهم.. وبناء عليه كل اصحابى هرشوا الفيلم.. وبقوا يروحوا البيت عندنا واقعين من الجوع وبناء على طيبه قلب الحاجه.. كل اصحابى بنين وبنات حسوا بالاطمئنان لها وارتاحوا لها خالص ..فساعات اكون انا بره البيت ..وارجع متأخر..وادخل البيت الاقى واحد صاحبى حلوف نازل اكل ماتقولش انه فى موائد الرحمن..واسأله انت هنا من امتى.. يقول لى من فتره..عادى يعنى..قيمه طبقين رز وطبق بطاطس واحيانا اخرى ادخل البيت الاقى واحده صديقه قاعده مع الحاجه والاثنين نازلين سح سح سح.. خير يا جماعه.. كانت صديقتى دى بتشكيلها من خطيبها او جوزها او انها تعبانه فى شغلها
والحق اقول..انا لما انزل مصر اجازه..بأنزل فى فنادق..وباحجز للحاجه معايا علشان نتفادى اصدقائى من الحلاليف الجياع لمده معينه..بس بعد يومين بالكتير الحاجه بتحن للبيت لان الناس وحشوها والجيران.. وبناءا عليه نسيب الفندق وارجع البيت اتفرج على اصحابى وهما بيكلوا اويجوا يعيطوا من هجر الحبيب خلاص هانت..ان شاء الله.. هاشوف الحاجه..واللى مزنوق يبقى يقولى وانا اخليها تدعى له

الدعوه بدولار

Read More